চলিত বছৰৰ শেষৰফালে অনুষ্ঠিত হ’বলগীয়া বিটিচি নিৰ্বাচনক লৈ ৰাজনৈতিক দলসমূহৰ মাজত বৃদ্ধি পাইছে তপৰতা। প্ৰতিটো ৰাজনৈতিক দলেই এই নিৰ্বাচনত এককভাৱে অৱতীৰ্ণ হোৱাৰ সিদ্ধান্ত গ্ৰহণ কৰিছে। মূলতঃ নেশ্যনেল ডেম’ক্ৰেটিক এলায়েন্স চমুকৈ এন ডি এৰ সহযোগী দল বিজেপি, অগপ আৰু ইউ পি পি এলে পৃথকে পৃথকে নিৰ্বাচনত অৱতীৰ্ণ হোৱাৰ সিদ্ধান্তই বিশেষ আকৰ্ষণীয় কৰি তুলিব এই নিৰ্বাচন।
ইতিমধ্যে বিটিচিৰ ৪০টা সমষ্টিতে বিজেপিয়ে নিৰ্বাচনত প্ৰাৰ্থিত্ব প্ৰদান কৰাৰ কথা ঘোষণা কৰাৰ বিপৰীতে বৃহস্পতিবাৰে অগপই নিজাকৈ ১০খন আসনত প্ৰতিদ্বন্দ্বিতা কৰিব বুলি নিশ্চিত কৰে।
আজি বিজনীত অনুষ্ঠিত দলীয় কৰ্মী সভাৰ অন্তত সংবাদ মাধ্যমৰ আগত মন্তব্য কৰি অগপৰ কেন্দ্ৰীয় সমিতিৰ উপ-সভাপতি অপূৰ্ব ভট্টাচাৰ্যই কয়, ‘সম্প্ৰতি আমি নিজাববীয়াকৈ প্ৰতিদ্বন্দ্বিতা কৰিবলৈ ১০টা সমষ্টি চিনাক্ত কৰিছো। ইতিমধ্যে প্ৰস্তুতি আৰম্ভ হৈছে।’
আগন্তুক বিটিচি নিৰ্বাচনত প্ৰতিদ্বন্দ্বিতা কৰাৰ ক্ষেত্ৰত কোনো দলৰ সৈতে আনুষ্ঠানিকভাৱে মিত্ৰতা সন্দৰ্ভত আলোচনা হোৱা নাই বুলিও উল্লেখ কৰে অপূৰ্ব ভট্টাচাৰ্যই।
