আহমেদাবাদৰ পৰা লণ্ডন অভিমুখী এয়াৰ ইণ্ডিয়াৰ বিমানত সংঘটিত হোৱা দুৰ্ঘটনাৰ তদন্ত বৰ্তমানেও চলি আছে। ৰাষ্ট্ৰসংঘইও এই দুৰ্ঘটনাৰ তদন্তত যোগদান কৰিবলৈ ভাৰতৰ পৰা অনুমতি বিচাৰিছিল। কিন্তু এতিয়া সূত্ৰই জনাইছে যে, ভাৰতে ৰাষ্ট্ৰসংঘৰ এজন তদন্তকাৰীক এই বিমান দুৰ্ঘটনাৰ তদন্তত যোগদান কৰিবলৈ অস্বীকাৰ কৰিছে।
তথ্য অনুসৰি, আন্তঃৰাষ্ট্ৰীয় অসামৰিক বিমান পৰিবহণ সংস্থাই ভাৰতত থকা তদন্তকাৰীজনক পৰ্যবেক্ষকৰ মৰ্যাদা দিবলৈ কৈছিল, তাৰ পিছত ভাৰত কৰ্তৃপক্ষই এই প্ৰস্তাৱ নাকচ কৰে।
চলিত সপ্তাহৰ আৰম্ভণিতে ৰাষ্ট্ৰসংঘৰ বিমান সংস্থাটোৱে বয়িং ৭৮৭-৮ ড্ৰিমলাইনাৰ দুৰ্ঘটনাৰ পিছত তদন্তত সহায় কৰিবলৈ ভাৰতক নিজৰ এজন তদন্তকাৰীক প্ৰস্তাৱ দিয়াৰ পদক্ষেপ গ্ৰহণ কৰিছিল। অৱশ্যে এতিয়া ভাৰতে এই সহায় ল’বলৈ অস্বীকাৰ কৰিছে। ১২ জুনত আহমেদাবাদৰ পৰা লণ্ডনলৈ যোৱা এয়াৰ ইণ্ডিয়াৰ বিমান দুৰ্ঘটনাগ্ৰস্ত হয়। এই দুৰ্ঘটনাত ২৬৫ জন লোকৰ মৃত্যু হয়।
সূত্ৰসমূহে জনোৱা অনুসৰি, ভাৰতত উপস্থিত থকা তদন্তকাৰীজনক আইচিঅ’এ পৰ্যবেক্ষকৰ মৰ্যাদা দিবলৈ কৈছিল যদিও ভাৰতীয় বিষয়াসকলে এই প্ৰস্তাৱ নাকচ কৰে। বৃহস্পতিবাৰে চৰকাৰে কয় যে, ক’লা বাকচ (black box)ৰ পৰা তথ্য আহৰণ কৰি দুৰ্ঘটনাটোৰ তদন্ত অব্যাহত আছে।
অসামৰিক বিমান পৰিবহণ মন্ত্ৰালয়ে জনোৱা মতে, বিমান দুৰ্ঘটনা অনুসন্ধান ব্যুৰোৱে ততাতৈয়াকৈ তদন্ত আৰম্ভ কৰে আৰু ১৩ জুনত এএআইবিৰ মুৰব্বীগৰাকীৰ অধ্যক্ষতাত দুৰ্ঘটনাটোৰ তদন্তৰ বাবে এটা দল গঠন কৰা হয়। এক বিবৃতিত কোৱা হৈছে যে এই দলটোত এজন বিমান চিকিৎসা বিশেষজ্ঞ, এজন বিমান পৰিবহণ নিয়ন্ত্ৰণ (এটিচি) বিষয়া আৰু আমেৰিকাৰ ৰাষ্ট্ৰীয় পৰিবহণ সুৰক্ষা ব’ৰ্ডৰ (এনটিএছবি) প্ৰতিনিধি আছে।
ইফালে কেন্দ্ৰীয় গৃহ সচিবৰ নেতৃত্বত গঠিত এক উচ্চ পৰ্যায়ৰ কমিটীয়ে আহমেদাবাদত এয়াৰ ইণ্ডিয়াৰ বিমান দুৰ্ঘটনা সংঘটিত হোৱাৰ কাৰণৰ তদন্ত কৰি আছে। লগতে ভৱিষ্যতে এনে দুৰ্ঘটনাৰ পৰা হাত সাৰিবলৈ বিস্তৃত নিৰ্দেশনাৰ পৰামৰ্শ আগবঢ়াইছে।
আচলতে যোৱা ১২ জুন তাৰিখে আহমেদাবাদৰ পৰা লণ্ডন অভিমুখে ৰাওনা হৈছিল বিমানখন। এই বিমানখনত ২৪২ জন যাত্ৰী আছিল। টেক অফ কৰাৰ লগে লগে বিমানখনে দুৰ্ঘটনাৰ সন্মুখীন হ’বলগীয়া হয়। এই দুৰ্ঘটনাত বিমানখনত থকা ২৪২ জন যাত্ৰীৰ ভিতৰত ২৪১ জন যাত্ৰীৰ মৃত্যু হয়। এই দুৰ্ঘটনাটোৰ পৰা মাত্ৰ ১ জন লোকহে নিৰাপদে পলায়ন কৰিবলৈ সক্ষম হয়। লগতে বি জে মেডিকেল কলেজৰ হোষ্টেলত পৰিল বিমানখন। য’ত অগোছালিত খাই থকা ছাত্ৰ-ছাত্ৰীৰ মৃত্যু হোৱাৰ লগতে বহু গুৰুতৰভাৱে আহত হয়।
