২০২৬ চনত তামিলনাডুত অনুষ্ঠিত হ’বলগীয়া বিধানসভা নিৰ্বাচনৰ পূৰ্বে ভাৰতীয় জনতা পাৰ্টী চমুকৈ বিজেপিয়ে ঘোষণা কৰিলে ৰাজ্যিক সভাপতিৰ নাম। দলটোৱে নয়নাৰ নাগেন্দ্ৰনক প্ৰদেশ অধ্যক্ষৰ দায়িত্ব অৰ্পণ কৰে।
ইয়াৰ উপৰি বিজেপিয়ে এ আই ডি এম কেৰ সৈতে মিলি আগন্তুক বিধানসভা নিৰ্বাচনত অৱতীৰ্ণ হ’ব বুলিও ঘোষণা কৰে। চেন্নাইত এখন সংবাদমেল সম্বোধন কৰি দেশৰ গৃহমন্ত্ৰী অমিত শ্বাহে কয় যে অহা বৰ্ষত অনুষ্ঠিত হ’বলগীয়া নিৰ্বাচন এ আই ডি এম কে নেতৃত্বাধীন ই পলানীস্বামীৰ নেতৃত্বত অৱতীৰ্ণ হ’ব।
অমিত শ্বাহে কয় যে বিজেপি আৰু এ আই ডি এম কে নেতাসকলে ২০২৬ চনৰ বিধানসভা নিৰ্বাচনত একেলগে অৱতীৰ্ণ হোৱাৰ সিদ্ধান্ত গ্ৰহণ কৰিছে। ১৯৯৮ চনত জয়ললিতাৰ নেতৃত্বত আমাৰ মিত্ৰতা হৈছিল। এবাৰ এই মিত্ৰজোঁটে ৩৯টা লোকসভা সমষ্টিৰ ভিতৰত ৩০টাতেই এন ডি এৰ প্ৰাৰ্থীয়ে জয়লাভ কৰিছিল। মই সম্পূৰ্ণ বিশ্বাসী যে আগন্তুক নিৰ্বাচনত মিত্ৰজোঁটে সংখ্যাগৰিষ্ঠতাৰে চৰকাৰ গঠন কৰিব।
ইফালে বিজেপিৰ ৰাজ্যিক সভাপতিৰ দায়িত্ব লাভ কৰা নয়নাৰ নাগেন্দ্ৰনকো শুভেচ্ছা জ্ঞাপন কৰে গৃহমন্ত্ৰী অমিত শ্বাহে।
