মঙলবাৰে ছাংহাই সহযোগিতা সংস্থা (এছ চি অ’)ৰ বৈঠকত সন্ত্ৰাসবাদ বন্ধ কৰাৰ বাবে এক শক্তিশালী বাৰ্তা প্ৰদান কৰে ৰাষ্ট্ৰীয় নিৰাপত্তা উপদেষ্টা অজিত ডোভালে। তেওঁ সন্ত্ৰাসবাদক প্ৰচাৰ কৰা, ইয়াৰ সংগঠক আৰু ইয়াৰ বাবে ধন আগবঢ়োৱাসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনায়। এই বক্তব্য মূলতঃ পাকিস্তানে সমৰ্থিত সন্ত্ৰাসবাদৰ বিৰুদ্ধে বুলি বিবেচনা কৰা হৈছে।
ভাষণ প্ৰসংগত ডোভালে কয় যে ৰাষ্ট্ৰসংঘই নিষিদ্ধ কৰা লস্কৰ-ই-তৈবা, জৈছ-ই-মহম্মদ, আল কায়দা, আইছিছৰ দৰে সন্ত্ৰাসবাদী সংগঠনৰ পৰা ভাৰতে অহৰহ ভাবুকিৰ সন্মুখীন হৈ আহিছে।
তেওঁ পহলগামত সংঘটিত সন্ত্ৰাসবাদী আক্ৰমণৰ কথা উল্লেখ কৰে, য’ত লস্কৰ-ই-তৈবাৰ সংগঠন টি আৰ এফে ২৬ জন ভাৰতীয় আৰু এজন নেপালী নাগৰিকক হত্যা কৰাৰ লগতে বহু লোকক গুৰুতৰভাৱে আঘাতপ্ৰাপ্ত কৰিছিল।
এই আক্ৰমণৰ প্ৰত্যুত্তৰত ভাৰতে চলোৱা অপাৰেশ্যন সিন্দূৰক ডোভালে এক নিখুঁত আৰু সংযত কাৰ্য্য বুলি অভিহিত কৰে।
তেওঁ সন্ত্ৰাসবাদী সংগঠন আৰু তেওঁলোকৰ সমৰ্থকসকলৰ বিৰুদ্ধে সুনিৰ্দিষ্ট পদক্ষেপ গ্ৰহণ কৰিবলৈ সকলো দেশক আহ্বান জনায়। ডোভালে লগতে কয় যে সীমা অতিক্ৰম কৰি সন্ত্ৰাসবাদকে ধৰি যিকোনো সন্ত্ৰাসবাদী কাৰ্য্য মানৱতাৰ বিৰুদ্ধে অপৰাধ।
তেওঁ এছ চি অ’ দেশসমূহক সন্ত্ৰাসবাদী, তেওঁলোকৰ সংগঠক, পুঁজিদাতা আৰু সমৰ্থকক শাস্তি প্ৰদানৰ ক্ষেত্ৰত সহযোগিতা আগবঢ়াবলৈ অনুৰোধ জনায়। লগতে সন্ত্ৰাসবাদ, বিচ্ছিন্নতাবাদ আৰু উগ্ৰবাদৰ বিৰুদ্ধে যুঁজিবলৈ এক ঐক্যবদ্ধ তথ্য অভিযান চলোৱাৰ কথাও উল্লেখ কৰে।
ডোভালে স্পষ্ট কৰি দিলে যে সন্ত্ৰাসবাদ সহ্য কৰা নহ’ব। পহলগাম আক্ৰমণৰ পিছত ভাৰতে সন্ত্ৰাসবাদীৰ আত্মগোপন স্থান ধ্বংস কৰাৰ পদক্ষেপ গ্ৰহণ কৰিছে। তেওঁ বিচাৰে যে সন্ত্ৰাসবাদৰ বিৰুদ্ধে সকলো দেশ একত্ৰিত হওক আৰু ইয়াৰ বাবে দায়ীসকলক শাস্তি দিয়া উচিত।
