আজি নিশা ১০ বজাত আমেৰিকাৰ পৰা অমৃতসৰত উপস্থিত হ’ব অবৈধ অনুপ্ৰৱেশকাৰী ভাৰতীয়ৰ দ্বিতীয়টো দল। আমেৰিকাৰ পৰা অমৃতসৰলৈ অহা এই সামৰিক বিমানখনত থাকিব ১১৯ জনকৈ ভাৰতীয় লোক।
আমেৰিকাৰ পৰা বিতাড়িত হ’বলগীয়া ১১৯ জন অবৈধ ভাৰতীয় অনুপ্ৰৱেশকাৰীৰ ভিতৰত সৰ্বাধিক ৬৭ জন হৈছে পঞ্জাৱৰ। দ্বিতীয় স্থানত আছে হাৰিয়ানা। হাৰিয়ানাৰ ৩৩ জন লোকক অন্তৰ্ভুক্ত কৰা হৈছে।
ইয়াৰ উপৰিও আছে গুজৰাটৰ ৮ জন, উত্তৰ প্ৰদেশৰ ৩ জন, গোৱা, মহাৰাষ্ট্ৰ আৰু ৰাজস্থানৰ ২ জন আৰু হিমাচল প্ৰদেশ আৰু জম্মু-কাশ্মীৰৰ ১ জন । শনিবাৰে নিশা প্ৰায় ১০ বজাত বিমানখন অমৃতসৰ বিমানবন্দৰত অৱতৰণ কৰাৰ সম্ভাৱনা আছে।
বিগত মাহত ড’নাল্ড ট্ৰাম্পে আমেৰিকাৰ ৰাষ্ট্ৰপতি হিচাপে শপত গ্ৰহণ কৰাৰ পিছতেই ইয়াৰ পৰা বিতাড়িত হোৱা ভাৰতীয়ৰ এইটো হ’ব দ্বিতীয়টো গোট। ইয়াৰ পূৰ্বে ফেব্ৰুৱাৰী মাহৰ আৰম্ভণিতে ১০৪ জনীয়া অবৈধ অনুপ্ৰৱেশকাৰীৰ এটা গোট অমৃতসৰত উপস্থিত হৈছিল।
আচলতে আমেৰিকাই ইয়াৰ পূৰ্বেও অবৈধ অনুপ্ৰৱেশকাৰীক বিতাড়িত কৰাত প্ৰথমবাৰৰ সংসদত এই সন্দৰ্ভত হুলস্থুলৰ সৃষ্টি হৈছিল। বৈদেশিক মন্ত্ৰী এছ জয়শংকৰে নিজেই সংসদত কৈছিল যে এই প্ৰক্ৰিয়া নতুন নহয়। ইয়াৰ পূৰ্বেও এনেকুৱা হৈছে।
প্ৰধানমন্ত্ৰী মোদীয়ে স্পষ্টকৈ কৈছে যে, ভাৰতে আমেৰিকাত বসবাস কৰা অবৈধ অনুপ্ৰৱেশকাৰীক গ্ৰহণ কৰিব। এয়া কেৱল ভাৰতৰ বিষয় নহয়। এয়া এক বিশ্বব্যাপী সমস্যা। আন দেশত অবৈধভাৱে বাস কৰা লোকসকলৰ সেই দেশত বাস কৰাৰ কোনো আইনী অধিকাৰ নাই। আমি অবৈধ অনুপ্ৰৱেশকাৰীক ঘূৰাই ল’বলৈ সাজু।
একে সময়তে অবৈধ প্ৰবাসী ভাৰতীয়ৰ উভতি অহাৰ সন্দৰ্ভত পঞ্জাৱৰ মুখ্যমন্ত্ৰী ভগৱন্ত মানে কেন্দ্ৰৰ বিৰুদ্ধে পঞ্জাৱক বদনাম কৰাৰ অভিযোগ উত্থাপন কৰিছে।
