আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ঘনিষ্ঠ উপদেষ্টা এজনে ভাৰতৰ ওপৰত ক্ষোভিত হৈছে। তেওঁ কৈছে যে ভাৰতে ৰাছিয়াৰ পৰা তেল ক্ৰয় কৰা বন্ধ কৰিব লাগে। এক প্ৰতিবেদন অনুসৰি ট্ৰাম্পৰ সহায়ক ষ্টিফেন মিলাৰে অভিযোগ কৰিছে যে ভাৰতে ৰাছিয়াৰ পৰা তেল ক্ৰয় কৰি ইউক্ৰেইনত যুদ্ধৰ প্ৰচাৰ কৰিছে।
হোৱাইট হাউছৰ উপ-মুখ্য কৰ্মচাৰী তথা আমেৰিকাৰ ৰাষ্ট্ৰপতিৰ অন্যতম প্ৰভাৱশালী সহায়ক ষ্টিফেন মিলাৰে কয় যে, ট্ৰাম্পে অতি স্পষ্টভাৱে কৈছে যে ভাৰতে ৰাছিয়াৰ পৰা তেল ক্ৰয় কৰি যুদ্ধৰ বাবে ধন আগবঢ়োৱাটো গ্ৰহণযোগ্য নহয়।
এক প্ৰতিবেদনত দাবী কৰা হৈছে যে আমেৰিকাৰ এই ভাবুকি সত্ত্বেও ভাৰতে ৰাছিয়াৰ ৰাজধানী মস্কোৰ পৰা তেল ক্ৰয় কৰিয়েই আছে। একে সময়তে ভাৰতে যদি ট্ৰাম্পৰ কথা নুশুনে, তেন্তে ভাৰতৰ ওপৰত ১০০ শতাংশ শুল্ক আৰোপ কৰা হ’ব বুলিও দাবী কৰিছে মিলানে।
ভাৰত আৰু আমেৰিকাৰ মাজত বাণিজ্যিক চুক্তি বৰ্তমানেও চূড়ান্ত হোৱা নাই। এই সন্দৰ্ভত দুয়োখন দেশৰ মাজত কেইবাবাৰো আলোচনা হৈছে। ইফালে ভাৰতৰ ওপৰত হেঁচা বৃদ্ধিৰ বাবে ট্ৰাম্পে ২৫ শতাংশ শুল্ক আৰোপ কৰিছে।
৩১ জুলাইত তেওঁ এই কথা ঘোষণা কৰিছিল যদিও ঘোষণাৰ এসপ্তাহৰ পিছত এই কথা কাৰ্যকৰী হ’ব। আমেৰিকাই বিচাৰে ভাৰতে কৃষি আৰু দুগ্ধ খণ্ডত ৰেহাই দি এই সন্দৰ্ভত চুক্তি স্বাক্ষৰ কৰক, কিন্তু ভাৰত ইয়াৰ বাবে সাজু হোৱা নাই। এই কাৰণেই দুয়োখন দেশৰ মাজত বাণিজ্যিক চুক্তিৰ বিষয়টো আৱদ্ধ হৈ আছে। ট্ৰাম্পে বাৰে বাৰে ভাবুকি দি ভাৰতক হেঁচা প্ৰয়োগ কৰি আছে।
