বাণিজ্য আৰু শক্তিক লৈ আমেৰিকা আৰু ভাৰতৰ মাজত বৃদ্ধি পাইছে তীব্ৰ উত্তেজনা। আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ ওপৰত ৫০% শুল্ক আৰোপ কৰাৰ লগতে ৰাছিয়াৰ তেল ক্ৰয়ক লৈ অসন্তুষ্টি প্ৰকাশ কৰিছে।
ইয়াৰ পিছতে আমেৰিকাৰ কোষাগাৰ সচিব স্কট বেছাণ্টে দুয়োখন দেশৰ সম্পৰ্কক লৈ এক শক্তিশালী বাৰ্তা প্ৰদান কৰিছে। বেছাণ্টে কয় যে, আমেৰিকা আৰু ভাৰতৰ মাজত এক শক্তিশালী ভেটি আছে আৰু দুয়োখন দেশৰ মাজত যিকোনো মতানৈক্য সমাধান কৰিব পৰা যাব।
সংবাদ মাধ্যমক দিয়া এক আছুতীয়া সাক্ষাৎকাৰত আমেৰিকাৰ কোষাগাৰ সচিব স্কট বেছাণ্টে কয় যে, আমেৰিকা আৰু ভাৰতৰ মাজৰ সম্পৰ্ক শক্তিশালী আৰু গণতান্ত্ৰিক দেশ দুখনৰ মাজত মতানৈক্য সমাধান কৰাটো সম্ভৱ। তেওঁ কয়, দুখন মহান দেশে নিজেই ইয়াৰ সমাধান কৰিব।
অৱশ্যে ভাৰতে ৰাছিয়াৰ পৰা খাৰুৱা তেল ক্ৰয় অব্যাহত ৰখাৰ ক্ষেত্ৰত বেছাণ্টে কঠোৰ স্থিতি গ্ৰহণ কৰে। তেওঁ কয় যে, ভাৰতৰ এই কাৰ্য্যই মস্কোৰ ইউক্ৰেইন যুদ্ধত আৰ্থিক সহায় আগবঢ়াইছে। তেওঁ কয় যে, ভাৰতে ৰাছিয়াৰ পৰা সস্তা তেল ক্ৰয় কৰি তাৰ পিছত শোধিত সামগ্ৰী বিক্ৰী কৰি ৰাছিয়াৰ যুদ্ধ প্ৰচেষ্টাত অৰিহণা যোগাইছে। এয়া ভাল পদক্ষেপ নহয়।
ট্ৰাম্প প্ৰশাসনে ভাৰতৰ ওপৰত শুল্ক বৃদ্ধিৰ সিদ্ধান্তৰ কাৰণো বুজাই দিয়ে বেছাণ্টে। তেওঁ কয় যে বাণিজ্যিক আলোচনা লেহেমীয়া হোৱাৰ বাবে আমেৰিকাই ২৫% আৰু তাৰ পিছত ৫০% শুল্ক আৰোপ কৰাৰ পদক্ষেপ ল’বলগীয়া হৈছিল।
শেহতীয়াকৈ ভাৰতৰ প্ৰধানমন্ত্ৰী নৰেন্দ্ৰ মোডীৰ বৈঠকৰ কথাও উল্লেখ কৰে, য’ত পিএম মোদীয়ে এছচিঅ’ শীৰ্ষ সন্মিলনত ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু চীনৰ ৰাষ্ট্ৰপতি ছি জিনপিঙক সাক্ষাৎ কৰে। বেছাণ্টে কয় যে ভাৰতৰ মূল্য ব্যৱস্থা ৰাছিয়াৰ নহয়, আমেৰিকা আৰু চীনৰ ওপৰতহে নিৰ্ভৰ।
