ইৰাণৰ বিৰুদ্ধে সম্ভাৱ্য সামৰিক ব্যৱস্থাৰ সতৰ্কবাণীৰ মাজতে আমেৰিকাই মধ্যপ্ৰাচ্যত দশক দশক ধৰি সৰ্বাধিক নৌ আৰু বিমান নিয়োগ আৰম্ভ কৰিছে। ৰাষ্ট্ৰপতি ড’নাল্ড ট্ৰাম্পৰ কঠোৰ সতৰ্কবাণীৰ মাজতে এই অঞ্চললৈ হাজাৰ হাজাৰ আমেৰিকান সৈন্য প্ৰেৰণ কৰা হৈছে যদিও বিশ্বৰ সৰ্ববৃহৎ বিমানবাহী জাহাজ ইউ এছ এছ জেৰাল্ড আৰ ফৰ্ডত নিয়োজিত প্ৰায় ৫ হাজাৰ নাৱিকৰ বাবে পৰিস্থিতি সহজ হোৱাৰ পৰা বহু দূৰত।
ৰাষ্ট্ৰপতি ট্ৰাম্পে দ্বিতীয়বাৰৰ বাবে নিজৰ মিছন বৃদ্ধি কৰিছে। এই দীৰ্ঘদিনীয়া নিয়োগৰ ফলত জাহাজত বহুতো সমস্যাৰ সৃষ্টি হৈছে, য’ত শৌচাগাৰ বন্ধ হৈ যোৱা আৰু নলা-নৰ্দমা ব্যৱস্থাৰ সমস্যাও আছে।
জানুৱাৰী মাহত ভেনিজুৱেলাৰ প্ৰাক্তন ৰাষ্ট্ৰপতি নিকোলাছ মাদুৰোক ধৰি লোৱা অভিযানত বিমানবাহী জাহাজখনে মুখ্য ভূমিকা পালন কৰিছিল। সেই অভিযানৰ পিছত ক্ৰুসকলক জনোৱা হৈছিল যে ইৰাণৰ সম্ভাৱ্য আক্ৰমণৰ পোহৰত তেওঁলোকৰ নিয়োগ সম্প্ৰসাৰণ কৰা হৈছে। এতিয়া এই জাহাজখন মধ্যপ্ৰাচ্যলৈ ৰাওনা হৈছে, য’ত জাহাজখনে আমেৰিকাৰ আন এখন বিমানবাহী জাহাজৰ সৈতে যোগ দিব।
বিমানবাহী জাহাজৰ বাবে এটা সাধাৰণ শান্তিকালীন নিয়োগ প্ৰায় ছমাহ। অৱশ্যে ফৰ্ডৰ নাৱিকসকলে সাগৰত থকা আঠ মাহ হ’ল, আৰু এইবাৰ ১১ মাহ হ’ব পাৰে। যদি এনেকুৱা হয় তেন্তে আমেৰিকাৰ নৌসেনাৰ ইতিহাসৰ আটাইতকৈ দীৰ্ঘদিনীয়া অবিৰত নিয়োগ হ’ব।
জানুৱাৰী মাহত এক প্ৰতিবেদন অনুসৰি জাহাজখনৰ প্লাম্বিং ব্যৱস্থাৰ অৱনতি ঘটিছিল। ১৩ বিলিয়ন ডলাৰৰ জাহাজখনৰ বহু শৌচাগাৰৰ কাম বন্ধ হৈ গৈছে আৰু নাৱিকসকলে লিক মেৰামতিৰ বাবে দিনে-নিশাই কাম কৰি আছে। প্ৰতিবেদনত উল্লেখ কৰা হৈছে যে, ভেকুৱাম ব্যৱস্থাৰ বাবে এটা শৌচাগাৰত বিজুতি ঘটিলে সমগ্ৰ অঞ্চলটোৰ শৌচাগাৰত প্ৰভাৱ পৰিব পাৰে। টি-চাৰ্টৰ পৰা আৰম্ভ কৰি চাৰি ফুট দীঘল ৰছীলৈকে ক্ষতিসাধন ব্যৱস্থাটোত আবদ্ধ হৈ থকা দেখা গৈছে। ৰিপৰ্ট কৰা আটাইতকৈ সাধাৰণ সমস্যাটো হ’ল শৌচাগাৰৰ পিছফালে থকা এটা ঢিলা অংশ।
ৱাশ্বিংটনত বৰ্তমান মধ্যপ্ৰাচ্যত এক ডজনতকৈও অধিক যুদ্ধজাহাজ নিয়োজিত কৰা হৈছে । ইয়াৰ ভিতৰত আছে বিমানবাহী জাহাজ ইউ এছ এছ আব্ৰাহাম লিংকন, ৯খন ধ্বংসকাৰী জাহাজ আৰু তিনিখন উপকূলীয় যুদ্ধ জাহাজ। সাধাৰণতে মধ্যপ্ৰাচ্যত একে সময়তে দুখন আমেৰিকাৰ বিমানবাহী জাহাজৰ উপস্থিতি বিৰল বুলি গণ্য কৰা হয়।
