কেন্দ্ৰীয় গৃহমন্ত্ৰী অমিত শ্বাহে বৃহস্পতিবাৰে দিল্লীত জম্মু-কাশ্মীৰ আৰু লাডাখ: ধাৰাবাহিকতা আৰু সংযোগৰ ঐতিহাসিক বৃত্তান্ত শীৰ্ষক গ্ৰন্থখনৰ উন্মোচনী অনুষ্ঠানত অংশ লৈ তেওঁ ৩৭০ অনুচ্ছেদ আৰু সন্ত্ৰাসবাদ সন্দৰ্ভত নিজৰ মতামত প্ৰকাশ কৰে। ইয়াৰ সমান্তৰালকৈ তেওঁ পাকিস্তান অধীকৃত কাশ্মীৰো অতি শীঘ্ৰে ভাৰতৰ অংগ হ’ব বুলি ইংগিত দিয়ে।
তেওঁ কয়, ‘ব্ৰিটিছ যুগত লিখা ইতিহাসৰ ব্যাখ্যা ভুল আছিল। সমগ্ৰ বিশ্বৰ ভিতৰত ভাৰত এনে এখন দেশ যিখন সংস্কৃতিৰ সৈতে জড়িত। দেশখনক ভূ-ৰাজনৈতিক দৃষ্টিকোণৰ পৰা চোৱাসকলে এই দেশখনক ব্যাখ্যা কৰিব নোৱাৰে। কাশ্মীৰ ভাৰতৰ এক অবিচ্ছেদ্য অংশ আছিল আৰু সদায় হৈ থাকিব।’
গৃহমন্ত্ৰীয়ে কয়, ‘মোদী চৰকাৰে ৩৭০ অনুচ্ছেদ অন্ত পেলোৱাৰ কাম কৰিছে। এই অনুচ্ছেদ ৩৭০ য়ে কাশ্মীৰত সন্ত্ৰাসবাদ আৰু বিচ্ছিন্নতাবাদৰ বীজ সিঁচিছিল। ৩৭০ আঁতৰোৱাৰ পিছত সন্ত্ৰাসবাদী কাৰ্যকলাপ হ্ৰাস পাইছে।’
তেওঁ আৰু কয়, ‘বহু সময়ত মানুহে মোক প্ৰশ্ন কৰে যে ৩৭০ অনুচ্ছেদ আৰু সন্ত্ৰাসবাদৰ মাজত কি সম্পৰ্ক? তেওঁলোকে হয়তো নাজানে যে ৩৭০ অনুচ্ছেদটোৱে নিজেই উপত্যকাৰ যুৱক-যুৱতীসকলৰ মনত বিচ্ছিন্নতাৰ বীজ সিঁচিবলৈ চেষ্টা কৰিছিল।’
গ্ৰন্থ উন্মোচনী অনুষ্ঠানত শ্বাহে ভাষণত আৰু কয়, ‘৩৭০ নং অনুচ্ছেদে ভাৰত আৰু কাশ্মীৰৰ সংযোগ সাময়িক বুলি ভুল ধাৰণা বিয়পাই দিয়াৰ কাম কৰিছিল। ইয়াৰ ফলত বিচ্ছিন্নতাৰ বীজ সিঁচি দিয়া হৈছিল আৰু আগন্তুক দিনত ই সন্ত্ৰাসবাদলৈ ৰূপান্তৰিত হৈছিল। ৪০ হাজাৰতকৈ অধিক লোক ইয়াৰ বলি হৈছে। ৩৭০ অনুচ্ছেদ আঁতৰোৱাৰ পাছত সন্ত্ৰাসবাদী ঘটনা ৭০ শতাংশতকৈও অধিক হ্ৰাস পাইছে।
