দুদিনীয়া ভ্ৰমণসূচীৰে অসমলৈ অহা দেশৰ গৃহমন্ত্ৰী অমিত শ্বাহে আজি গুৱাহাটীৰ খানাপাৰাৰ পৰা কংগ্ৰেছ দলক ক্ষুৰধাৰ সমালোচনা কৰে। ‘এন ডি এ পঞ্চায়ত প্ৰতিনিধি সন্মিলন’ত ভাষণ প্ৰদান কৰি গৃহমন্ত্ৰী অমিত শ্বাহে নাম নোলোৱাকৈয়ে কংগ্ৰেছ সাংসদ গৌৰৱ গগৈক আক্ৰমণৰ লক্ষ্য কৰি লয়।
বিশাল সমাৱেশত ভাষণ প্ৰদান কৰি গৃহমন্ত্ৰী শ্বাহে কয়, ‘অনুপ্ৰৱেশকাৰীক ৰক্ষণাবেক্ষণ দিয়া লোকে অসমৰ নেতৃত্ব ল’ব নোৱাৰিব। বাৰে বাৰে পাকিস্তান যোৱা নেতাই অসমৰ নেতৃত্ব ল’ব নোৱাৰিব। অনুপ্ৰৱেশকাৰীক চৰকাৰী ভূমিত সংস্থাপন দিয়া লোকসকলে অসমক নেতৃত্ব প্ৰদান কৰিব নোৱাৰিব।’
অসমৰ নেতৃত্ব দুৰ্নীতিত লিপ্ত লোকসকলক দিব নোৱাৰি বুলি উল্লেখ কৰি অমিত শ্বাহে কয়, ‘অসমৰ নেতৃত্ব নৰেন্দ্ৰ মোদী আৰু হিমন্ত বিশ্ব শৰ্মাৰ নেতৃত্বত চলিব।’
অসম কংগ্ৰেছ নেতৃত্বৰ লগতে গৃহমন্ত্ৰী অমিত শ্বাহে গুৱাহাটীৰ পৰা কংগ্ৰেছ নেতা ৰাহুল গান্ধীকো তীব্ৰ সমালোচনা কৰে। বিহাৰত ‘ভোটাৰ অধিকাৰ যাত্ৰা’ ৰ সময়ত নৰেন্দ্ৰ মোদী আৰু তেওঁৰ প্ৰয়াত মাতৃক কটু ভাষাৰে সমালোচনা কৰা কাৰ্যক অতি নিন্দনীয় আখ্যা দিয়ে অমিত শ্বাহে।
শ্বাহে কয়, ‘বিহাৰত কংগ্ৰেছে প্ৰধানমন্ত্ৰী মোদীৰ মাতৃক লৈ অপশব্দ প্ৰয়োগ কৰিছে। তেওঁলোকৰ দুৰ্নীতিপৰায়ণ প্ৰচেষ্টা দেখি মই নিশ্চিত যে তেওঁলোকৰ ওচৰত জনসাধাৰণৰ সমৰ্থন নাই।’
ৰাহুল গান্ধীৰ যদি অলপো লাজ আছে তেন্তে নৰেন্দ্ৰ মোদী আৰু তেওঁৰ মাতৃক লৈ কৰা অপশব্দৰ বাবে ক্ষমা খুজিব লাগে বুলিও দাবী কৰে গৃহমন্ত্ৰী অমিত শ্বাহে।
উল্লেখ্য যে, দুদিনীয়া অসম ভ্ৰমণসূচীৰে বৃহস্পতিবাৰে বিয়লি গুৱাহাটীত উপস্থিত হৈছিল গৃহমন্ত্ৰী অমিত শ্বাহ। প্ৰথমটো কাৰ্যসূচী হিচাপে শ্বাহে বাজপেয়ী ভৱনত আগন্তুক অসম বিধানসভা নিৰ্বাচনৰ প্ৰস্তুতিৰ বিষয়ে আলোচনা আৰু কৌশল ৰচনাৰ বাবে নৱগঠিত ১৮ জনীয়া কৰ্ণধাৰ সমিতিৰ সৈতে বৈঠকত মিলিত হয়।
ভ্ৰমণ কাৰ্যসূচীৰ দ্বিতীয় দিনা শ্বাহে নতুনকৈ নিৰ্মাণ কৰা ৰাজভৱন মুকলি, ৰাষ্ট্ৰীয় চাইবাৰ ফৰেনছিক পৰীক্ষাগাৰৰ শুভাৰম্ভৰ লগতে আন কেইবাটাও কাৰ্যসূচীত অংশ লয়।
