এবাৰ-দুবাৰ নহয়, চাৰিবাৰকৈ ভাৰতীয় লোকসেৱা আয়োগৰ পৰীক্ষাত সফলতাৰে উত্তীৰ্ণ হৈয়ো আজিলৈকে কোনো ধৰণৰ সেৱাত নিযুক্তি নোপোৱা এজন মেধাবী ছাত্ৰৰ কাহিনীয়ে অনুপ্ৰাণিত কৰিব আপোনাক। বৰ্তমান ইছৰোৰ বিজ্ঞানী হিচাপে কৰ্মৰত হৈ আছে ছাত্ৰজন। ইছৰোৰ বিজ্ঞানী কাৰ্তিক কংসলে ইউপিএছচি পৰীক্ষাত ৪ বাৰ উত্তীৰ্ণ হৈছে কিন্তু কোনো সেৱা আৱণ্টন হোৱা নাই কাৰ্তিকৰ বিৰুদ্ধে।
কাৰ্তিক কংসলৰ কাহিনী যথেষ্ট অনুপ্ৰেৰণাদায়ক। কাৰ্তিক কংসল এজন বিশেষভাৱে সক্ষম লোক। তেওঁ পিডব্লিউবিডি-১ শ্ৰেণীৰ অন্তৰ্গত। তেওঁ উত্তৰাখণ্ডৰ ৰুড়কীৰ বাসিন্দা। কাৰ্তিক পেশীগত ডিষ্ট্ৰোফিতত ভুগিছে। এই ৰোগৰ বাবে তেওঁৰ পেশীবোৰ দুৰ্বল হৈ পৰিছে। তেওঁ ১৪ বছৰ বয়সৰ পৰা হুইলচেয়াৰত জীৱন-যাপন কৰিছে।
কোন হয় কাৰ্তিক কংসলঃ
কাৰ্তিক কংসল উত্তৰাখণ্ডৰ ৰুড়কীৰ বাসিন্দা। তেওঁ আইআইটি ৰুড়কীৰ পৰা মেকানিকেল বিভাগত বিটেক ডিগ্ৰী লাভ কৰিছে। বৰ্তমান তেওঁ ইছৰোৰ বিজ্ঞানী হিচাপে কৰ্মৰত হৈ আছে। অল ইণ্ডিয়া চেট্ৰেল ৰিকুৱাৰমেন্টৰ জৰিয়তে তেওঁৰ নিৰ্বাচন ভাৰতীয় স্পেছ ৰিচাৰ্জ অৰৰ্গেনাইজেচনত হৈছিল। অৱশ্যে, তেওঁ ৪ বছৰৰ পৰাই শাৰিৰীক অক্ষমতাক আকোৱালি লৈছিল। যাৰবাবে তেওঁ ১৪ বছৰ বয়সৰ পৰাই হুইল চেয়াৰক সংগী কৰিব লগা হ’ল। ইফালে, কাৰ্তিক আক্ৰান্ত হোৱা ৰোগৰ কোনো ধৰণৰ চিকিৎসা নাই বুলিও জনাই চিকিৎসা বিজ্ঞানে।
ইউপিএছচিত ৪ বাৰকৈ সফল হৈছে কাৰ্তিকঃ
ইউপিএছচি অসামৰিক সেৱা পৰীক্ষা বিশ্বৰ আটাইতকৈ কঠিন পৰীক্ষাৰ তালিকাত অন্তৰ্ভুক্ত কৰা হয়। এই পৰীক্ষাত উত্তীৰ্ণ হোৱাটো সহজ নহয়। বহু পৰীক্ষাৰ্থীৰ বাবে এই পৰীক্ষাৰ প্ৰৱেশ পৰীক্ষাত উত্তীৰ্ণ হোৱাটোও প্ৰত্যাহ্বান হয়। অৱশ্যে, কাৰ্তিক কংসলে বিগত বহু বছৰ ধৰি ধাৰাবাহিকভাৱে লোকসেৱা আয়োগৰ পৰীক্ষাত সফলতাৰে উত্তীৰ্ণ হৈ আহিছে। তেওঁ ২০১৯ চনত (৮১৩ নম্বৰ), ২০২১ (২৭১ নম্বৰ), ২০২২ (৭৮৪ নম্বৰ) আৰু ২০২৩ (৮২৯)ত ৰেংকত অসামৰিক সেৱা পৰীক্ষাত উত্তীৰ্ণ হৈছিল।
চাৰ্ভিছ নোপোৱাৰ কাৰণঃ
কাৰ্তিকৰ অক্ষমতাৰ প্ৰমাণপত্ৰত তেওঁ ৬০ শতাংশ কাম কৰিবলৈ অসমৰ্থ দেখুওৱা হৈছে। অৱশ্যে, ইউপিএছচি বোৰ্ডৰ অনুসন্ধানত কাৰ্তিক ৯০ শতাংশ অক্ষমতা হিচাপে ধৰা পৰিছে। ইউনিয়ন পাব্লিক চাৰ্ভিচ কমিছনে ভাৰতীয় ৰাজহ সেৱা (আয়কৰ), গ্ৰুপ এ আৰু ভাৰতীয় ৰাজহ সেৱা (শুল্ক আৰু আবকাৰী)ৰ বাবে যোগ্য প্ৰাৰ্থীসকলৰ সেৱাৰ চৰ্তাৱলীত পেশীৰ ডিষ্ট্ৰোফি অন্তৰ্ভুক্ত কৰিছিল। কাৰ্তিক কংসলে এই সেৱাবোৰ তেওঁৰ অগ্ৰাধিকাৰ তালিকাত বাছনি কৰিছিল কিন্তু তথাপিও তেওঁ নিযুক্তি লাভ কৰা নাছিল।
খালী পদ থকাৰ পিছতো নিযুক্তি নহ’ল কাৰ্তিকৰঃ
২০১৯ চনতে কাৰ্তিক কংসলক ৮১৩ তম স্থানৰ সৈতে সেৱা আৱণ্টন কৰিব পৰা গ’ল হয়। সেই বছৰ লোকোমটৰ বিকলাংগতাৰ অধীনত ১৫ টা পদ খালী আছিল। যাৰ ভিতৰত ১৪ টা পদত নিযুক্তি দিয়া হৈছিল। তাৰ পিছত ২০২১ চনত লোকোমটৰ বিকলাংগতা শ্ৰেণীৰ ৭ টা পদৰ ভিতৰত মাত্ৰ ৪ টা পদ পূৰণ কৰা হৈছিল। কাৰ্তিক কংসল এই শ্ৰেণীৰ প্ৰথম স্থানত আছিল যদিও তেওঁ নিযুক্তি লাভ কৰা নাছিল। ২০২১ চনত তেওঁৰ স্থান আইএএছৰ প্ৰথম স্থানত আছিল। অৱশ্যে, তেতিয়া ইউপিএছচিয়ে আইএএছৰ বাবে যোগ্য প্ৰাৰ্থীসকলৰ সেৱাৰ চৰ্তত পেশীৰ ডিষ্ট্ৰোফি অন্তৰ্ভুক্ত কৰা নাছিল।
