ইংলেণ্ডৰ বিৰুদ্ধে চলি থকা টেষ্ট শৃংখলাৰ অন্তিম দুখন মেচৰ বাবে ভাৰতীয় দলত অন্তৰ্ভুক্ত হৈছে অঞ্চুল কম্বোজ। আঙুলিৰ আঘাতৰ বাবে চতুৰ্থ টেষ্টৰ পৰা বাহিৰ হোৱা অৰ্শদ্বীপ সিঙৰ ঠাইত কম্বোজক দলত স্থান দিয়া হৈছে।
বিচিচিআইৰ এটা সূত্ৰই জানিব দিয়ে যে অনুশীলনৰ সময়ত হাতৰ আঙুলিত আঘাত পাইছে অৰ্শদ্বীপ সিঙে। সম্পূৰ্ণ সুস্থ হৈ থাকিবলৈ তেওঁক অতি কমেও ১০ দিনৰ সময় লাগিব, সেয়ে নিৰ্বাচকে তেওঁৰ ঠাইত দলত অঞ্চুল কম্বোজক অন্তৰ্ভুক্ত কৰিছে।
শৃংখলাটোৰ চতুৰ্থখন মেচ ২৩ জুলাইৰ পৰা অ’ল্ড ট্ৰেফৰ্ডত অনুষ্ঠিত হ’ব। এই মেচখন ভাৰতৰ বাবে অত্যন্ত গুৰুত্বপূৰ্ণ, কিয়নো শৃংখলাটোত বৰ্তি হৈ থাকিবলৈ ভাৰতে এই মেচখন জয়ী হ’বই লাগিব।
পাঁচখন মেচৰ শৃংখলাটোত সম্প্ৰতি ভাৰত ২-১ ব্যৱধানত পিছ পৰি আছে।
উল্লেখ্য যে, এই পৰ্যন্ত ভাৰতীয় দলৰ হৈ কোনো এটা ফৰ্মেটতে অভিষেক ঘটা নাই অঞ্চুল কম্বোজৰ। তেওঁ ২৪খন প্ৰথম শ্ৰেণীৰ মেচৰ ৪১টা ইনিংছত ৭৯টা উইকেট দখল কৰিছে। আনহাতে লিষ্ট এ ক্ৰিকেটত ৪০টা আৰু ঘৰুৱা টি-২০ত ৩৪টা উইকেট দখল কৰিছে।
