ট্ৰেইন হাইজেক ঘটনাৰ চাঞ্চল্য মাৰ নৌযাওতেই পুনৰ এক ভয়ংকৰ ঘটনা সংঘটিত হৈছে পাকিস্তানৰ বেলুচিস্তানত। বিদ্ৰোহী সংগঠন বেলুচিস্তান লিবাৰেশ্যন আৰ্মীয়ে পাক সেনাৰ ওপৰত কৰিছে ভয়ংকৰ আক্ৰমণ। এই আক্ৰমণত কমেও ৯০ গৰাকী সেনা জোৱান নিহত হোৱা বুলি দাবী কৰিছে বিদ্ৰোহী সংগঠনটোৱে।
দ্য বেলুচিস্তান পোষ্টৰ তথ্য অনুসৰি পাকিস্তানী সেনাৰ কনভয়ৰ ওপৰত সংঘটিত হৈছে এই আক্ৰমণ। আনহাতে স্থানীয় সূত্ৰৰ উদ্ধৃতিৰে সংবাদ মাধ্যমে প্ৰকাশ কৰা খবৰ অনুসৰি আৰ চি ডি ঘাইপথত সেনাৰ কনভয়ক আক্ৰমণ কৰা হয়।
জানিব পৰা অনুসৰি, বিদ্ৰোহী গোটটোৱে প্ৰথমে বিস্ফোৰণ সংঘটিত কৰে আৰু তাৰ পিছত প্ৰচণ্ড গুলীচালনা হয়। এই আক্ৰমণৰ পিছত কেইবাখনো এম্বুলেন্স আৰু নিৰাপত্তা বাহিনী ঘটনাস্থলীলৈ ৰাওনা হোৱাৰ লগতে চিকিৎসালয়সমূহত জৰুৰীকালীন অৱস্থা ঘোষণা কৰা হৈছে।
ইফালে পাকিস্তান সেনাৰ কনভয়ত আক্ৰমণৰ দায়িত্ব লৈ বিএলএৰ মুখপাত্ৰ জেয়ান বেলুচে কয়, ‘বিএলএৰ আত্মঘাতী শাখা মজিদ ব্ৰিগেডে কেইঘণ্টামান পূৰ্বে নোছকিৰ আৰচিডি হাইৱেৰ ৰাছখান মিলৰ ওচৰত পাকিস্তান সেনাৰ কনভয়ক লক্ষ্য কৰি লয়। এই কনভয়ত আঠখন বাছ আছিল, ইয়াৰে এখন বাছ সম্পূৰ্ণৰূপে ধ্বংস হৈছে।’
আনহাতে এই আক্ৰমণত পাকিস্তান সেনাৰ ৯০ জন জোৱান নিহত হোৱা বুলিও বিএলএই দাবী কৰে।
