আজি ৰাজ্যজুৰি পালন কৰা হয় শ্বহীদ দিৱস। এই উপলক্ষে জিলাই জিলাই পৰিৱেশন কৰা হয় শ্বহীদ প্ৰণামো তোমাক গীতটি।
উল্লেখ্য যে, ১৯৭৯ চনৰ ১০ ডিচেম্বৰৰ দিনটোতে অসম আন্দোলনৰ সময়ত বৰপেটাত আৰক্ষীৰ গুলীত নিহত হৈছিল খৰ্গেশ্বৰ তালুকদাৰ। তেওঁ হৈছে ছবছৰীয়া অসম আন্দোলনৰ প্ৰথম গৰাকী শ্বহীদ। প্ৰথম শ্বহীদ খৰ্গেশ্বৰ তালুকদাৰৰ স্মৃতিত আজিৰ দিনটো ৰাজ্যজুৰি শ্বহীদ দিৱস হিচাপে পালন কৰি অহা হৈছে।
আজি এই বিশেষ দিনটোত মহানগৰীৰ বৰাগাঁৱত মুকলি কৰা হয় শ্বহীদ স্মাৰক ক্ষেত্ৰ। মুখ্যমন্ত্ৰী ড০ হিমন্ত বিশ্ব শৰ্মাই আনুষ্ঠানিকভাৱে মুকলি কৰে ৮৬০ গৰাকী শ্বহীদৰ স্মৃতি বিজড়িত স্মাৰকক্ষেত্ৰ। এই অনুষ্ঠানত কেন্দ্ৰীয় মন্ত্ৰী সৰ্বানন্দ সোনোৱালৰ লগতে মন্ত্ৰী অতুল বৰাও উপস্থিত থাকে।
অসম আন্দোলনত নিজৰ প্ৰাণ আহুতি দিয়া প্ৰত্যেকগৰাকী বীৰলৈ সন্মান জনাই এই স্মাৰকক্ষেত্ৰ নিৰ্মাণ কৰা হৈছে। শ্বহীদ দিৱসৰ দিনাই ৰাইজৰ বাবে উছৰ্গা কৰা হৈছে এই শ্বহীদ স্মাৰকক্ষেত্ৰ। আজি ৮৬০ গৰাকী শ্বহীদক শ্ৰদ্ধাঞ্জলিও জ্ঞাপন কৰা হয়।
এই শ্বহীদ স্মাৰকক্ষেত্ৰত অসম আন্দোলনৰ তথ্যৰ লগতে ৮৬০ গৰাকী শ্বহীদৰ আৱক্ষ মূৰ্তি আছে। এই স্মাৰকক্ষেত্ৰ উদ্বোধনী অনুষ্ঠানত ৮৬০ গৰাকী শ্বহীদৰ পৰিয়ালৰ লোক উপস্থিত থাকে। এই অনুষ্ঠানতেই আৱেগিক হৈ উচুপি উঠে বহুজনে।
এই অনুষ্ঠানত অসমৰ ৰাইজলৈ এক ডাঙৰ আহ্বান জনায় মুখ্যমন্ত্ৰী ড০ হিমন্ত বিশ্ব শৰ্মাই। তেওঁ কয় যে, এটকা বেছিকৈ দিলেও অচিনাকী মানুহক মাটি বিক্ৰী কৰিব নালাগে। পৰিয়ালত যিমানে অসুবিধা নহওক কিয় কোনেও অচিনাক্ত লোককে মাটি বিক্ৰী কৰিব নালাগে।
লগতে তেওঁ কয় যে, ফ্লাই অভাৰ, ফুটপাথত কোনো অচিনাকী লোকে ব্যৱসায় কৰিব নোৱাৰিব। চহৰৰ ব্যৱসায়িক প্ৰতিষ্ঠানত থলুৱা লোকক নিয়োগৰ ব্যৱস্থা কৰিবলৈ আহ্বান জনায় মুখ্যমন্ত্ৰীয়ে। লগতে ধনৰ বাবে অচিনাকী মানুহক মাটি বিক্ৰী নকৰিবলৈ কয় মুখ্যমন্ত্ৰীয়ে।
