বিগত দুটা দিনত ২টাকৈ চাঞ্চল্যকৰ ঘটনাই জোকাৰি গৈছে গুৱাহাটী মহানগৰ। ১১ মে’ত মাতৃ আৰু অবৈধ প্ৰেমিকে মিলি ১০ বছৰীয়া এটি শিশুক হত্যা কৰাৰ ঘটনা পোহৰলৈ অহাৰ এদিন পাছতে ১১ মে’ত গুৱাহাটীত সংঘটিত হয় আন এক ভয়ংকৰ ঘটনা।
ত্রিকোণ প্ৰেমৰ বাবেই শেষ হৈ যায় এটা জীৱন। মহানগৰীৰ গড়চুক চাৰিআলিত দিন-দুপৰতে অভিনেতা এজনক উপৰ্যুপৰি ছুৰিকাঘাত কৰি হত্যা কৰে। ছুৰীৰ আক্ৰমণত গুৰুতৰভাৱে আঘাতপ্ৰাপ্ত হোৱা মৃগাংক বৰ্মন (২৬) নামৰ যুৱকজনৰ পৰবৰ্তী সময়ত প্ৰাণহানি হয়।
জানিব পৰা মতে, দিন দুপৰতে গড়চুত চাৰিআলিৰ Silver Arcade বিল্ডিঙৰ পাৰ্কিঙত মৃগাংক ছূৰীৰে আক্ৰমণ কৰিছিল এজন লোকে। লগে লগে মৃগাংক বৰ্মনক হাস্পাতালত ভৰ্তি কৰোৱা হয় যদিও চিকিৎসাধীন অৱস্থাতে মৃত্যু হয় মৃগাংক বৰ্মনৰ।
ঘটনাৰ পাছতে আৰক্ষী ঘটনাস্থলীত উপস্থিত হৈ প্ৰহাৰ কৰা ছুৰীখন উদ্ধাৰ কৰি তদন্ত আৰম্ভ কৰে। ইয়াৰোপৰি হত্যাকাণ্ডত জড়িত থকাৰ অভিযোগত ৰাজু আলী নামৰ এজন লোকক গড়চুক আৰক্ষীয়ে গ্ৰেপ্তাৰ কৰে। হাজোৰ দামপুৰৰপৰা আৰক্ষীয়ে গ্ৰেপ্তাৰ কৰে অভিযুক্ত ৰাজু আলীক।
ঘটনাৰ বৰ্ণনা অনুসৰি, মৃগাংক বৰ্মন নামৰ যুৱক জন অভিনয় তথা মডেলিঙৰ সৈতে জড়িত আছিল। শুৱালকুছিৰ এগৰাকী বিবাহিতা মহিলা (৩৬)ৰ সৈতে প্ৰেমৰ সম্পৰ্ক আছিল মৃগাংকৰ।কিন্তু মহিলাগৰাকীৰ ৰাজু আলী নামৰ আন এজন যুৱকৰ সৈতেও প্ৰেমৰ সম্পৰ্ক আছিল।
১২ মে’ৰ দিনটোত মহানগৰীৰ গড়চুকৰ Silver Arcade অট্টালিকাটোত থকা Hi City Inn নামৰ হোটেলখনত দুপৰীয়া ১ বজাত মৃগাংকই ২০৯ নম্বৰ কোঠা বুক কৰিছিল। জানিব পৰা মতে, এই কোঠতেই মহিলাগৰাকীৰ সৈতে প্ৰায় ৩ ঘণ্টাকৈ সময় অতিবাহিত কৰিছিল মৃগাংকই। কিন্তু হোটেল এৰি দিয়াৰ পিছত পাৰ্কিঙত মহিলাগৰাকীৰ সৈতে কাজিয়াত লিপ্ত হৈছিল মৃগাংক।তাৰ পাছতে ৰাজু আলী নামৰ লোকজনে এই হত্যাকাণ্ড সংঘটিত কৰি তাৰ পৰা পলায়ন কৰে।
পিছে ঘাতক ৰাজু আলীয়ে আৰক্ষীক দিয়া ভাষ্য অনুসৰি, ৰাজুৱে কেৱল মৃগাংকক ছুৰীৰে আক্ৰমণ কৰাই নহয়, পাৰ্কিঙৰপৰা এডাল লাঠী লৈ মৃগাংকৰ সৈতে থকা মহিলাগৰাকীক, যি ৰাজুৰ প্ৰাক্তন প্ৰেমিকা আছিল বুলি দাবী কৰিছে, তেওঁকো লাঠীৰে প্ৰহাৰ কৰে।
স্থানীয় লোকে জনোৱা মতে, যুৱকজনে তেজেৰ লুতুৰী-পুতুৰী অৱস্থাত ৰাজপথলৈ ওলাই আহে আৰু সেই সময়তে বাইক লৈ ওলাই যায় এজন যুৱক। ইয়াৰ লগে লগে স্থানীয় লোকে খবৰ দিয়ে গড়চুক আৰক্ষীক।
আজি মৃগাংক বৰ্মনৰ মৰণোত্তৰ পৰীক্ষা সম্পন্ন কৰা হ’ব। আৰক্ষীয়ে ইতিমধ্যে মহিলাগৰাকীকো আটক কৰিছে যদিও তেওঁক মুকলি কৰি দিব বুলি জানিব পৰা গৈছে। ঘটনা সন্দৰ্ভত আৰক্ষীয়ে উচিত তদন্ত অব্যাহত ৰাখিছে। তদন্তৰ অন্তত অধিক তথ্য পোহৰলৈ অহাৰ সম্ভাৱনা আছে।
