কাছাৰৰ দয়াপুৰ চাহ বাগিছাৰ আতইছৰা বস্তীত সংঘটিত হয় এই চাঞ্চল্যকৰ হত্যাকাণ্ড। সুৰামত্ত খুড়াকে হত্যা কৰিলে ২ বছৰীয়া কনমানি নিজ ভতিজাকক। এই ভয়ংকৰ ঘটনাৰে জড়িত হত্যাকাৰী খুড়াক ছুঠন ৰিকিয়াশনক ইতিমধ্যে আৰক্ষীয়ে গ্ৰেপ্তাৰ কৰিছে।
৩০ জুলাইৰ সন্ধিয়া সংঘটিত হৈছে চাঞ্চল্যকৰ এই হত্যাকাণ্ড। জানিব পৰা মতে, নিজৰ ঘৰৰ চোতালত আন শিশুৰ সৈতে খেলি আছিল এই কণমানি শিশুটি। সেই সময়ত সুৰামত্ত অৱস্থাত উপস্থিত হৈ ছুঠন ৰিকিয়াশনে নিজৰ ২ বছৰীয়া ভতিজাকক ঘৰত লৈ যায় আৰু হত্যা কৰে।
উক্ত ঘটনাৰ সময়ত শিশুটিৰ পিতৃ-মাতৃ বাগিচাত কাম কৰি আছিল। ইফালে প্ৰতিৱেশীসকলে উক্ত ঘটনাৰ উমান পাই আৰক্ষীক খবৰ দিয়ে। ঘটনাস্থলীত আৰক্ষী উপস্থিত হৈ আটক কৰে হত্যাকাৰী খুড়া ছুঠন ৰিকিয়াশনক৷ তাৰপিছত আৰক্ষীয়ে হত্যাকাৰী খুড়াক গ্ৰেপ্তাৰ কৰি থানালৈ লৈ যায়। লগতে কণমানিটিৰ নিথৰ দেহ উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজলৈ প্ৰেৰণ কৰে। এই ঘটনাক কেন্দ্ৰ কৰি দয়াপুৰ চাহ বাগিচাত তীব্ৰ চাঞ্চল্যৰ সৃষ্টি হয়।
আনহাতে এই ঘটনা সন্দৰ্ভত কাছাৰৰ অতিৰিক্ত আৰক্ষী অধীক্ষক ৰজত কুমাৰে জনায় যে, ইতিমধ্যে হত্যাকাৰীক আৰক্ষীয়ে গ্ৰেপ্তাৰ কৰি তদন্ত আৰম্ভ কৰিছে। কি কাৰণত খুড়াকে নিজ ভতিজাক এনেদৰে হত্যা কৰিলে সেয়া বৰ্তমানেও স্পষ্ট হোৱা নাই যদিও আৰক্ষীৰ তদন্তৰ অন্তত সকলো বিষয় স্পষ্ট হ’ব বুলি জনায় অতিৰিক্ত আৰক্ষী অধীক্ষক গৰাকীয়ে।
