কেন্দ্ৰীয় চৰকাৰৰ দৰে অসম চৰকাৰৰ কৰ্মচাৰীৰ লগতে পেঞ্চনাৰসকলৰো মৰগীয়া বানচ বৃদ্ধি পালে। কেন্দ্ৰীয় চৰকাৰৰ কৰ্মচাৰীৰ সমহাৰত ৰাজ্য চৰকাৰৰ কৰ্মচাৰীয়েও ২ শতাংশ মৰগীয়া বানচ লাভ কৰিব বুলি শুকুৰবাৰে ঘোষণা কৰে মুখ্যমন্ত্রী ড০ হিমন্ত বিশ্ব শৰ্মাই।
এই বৰ্ধিত বানচ চলিত বছৰৰ ১ জানুৱাৰীৰ পৰা কাৰ্যকৰী কৰা হ’ব বুলি উল্লেখ কৰি মুখ্যমন্ত্ৰী শৰ্মাই কয়, ‘বিহুৰ পূৰ্বে দৰমহাৰ সৈতে ২ শতাংশ মৰগীয়া লাভ কৰিব আৰু বকেয়া ধনখিনি ক্ৰমে এপ্ৰিল-মে’ৰ দৰমহাৰ সৈতে লাভ কৰিব।’
আজি মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা ৰাজ্যিক কেবিনেট বৈঠকৰ পিছত এই সিদ্ধান্ত লোৱা হয় বুলি ঘোষণা কৰে।
উল্লেখ্য যে, যোৱা মাহৰ ২৮ তাৰিখে নৰেন্দ্ৰ মোদী নেতৃত্বাধীন চৰকাৰে কেন্দ্ৰীয় চৰকাৰৰ কৰ্মচাৰীৰ লগতে পেঞ্চনাৰসকলৰ বাবে ২ শতাংশ মৰগীয়া বানচ (ডি এ) বৃদ্ধিৰ অনুমোদন জনাইছিল।
কেন্দ্ৰীয় চৰকাৰৰ সেই ঘোষণা অনুসৰি আজি মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা কেবিনেট বৈঠকত ৰাজ্য চৰকাৰৰ কৰ্মচাৰীসকলৰ বাবে মৰগীয়া বানচ ২ শতাংশ বৃদ্ধি কৰাৰ সিদ্ধান্ত চূড়ান্ত কৰে।
