আজি ঘোষণা হ’ল গুণোৎসৱ ২০২৫ৰ ফলাফল। শ্ৰীমন্ত শংকৰদেৱ কলাক্ষেত্ৰত আয়োজিত এক চৰকাৰী অনুষ্ঠানত অসমৰ মুখ্যমন্ত্ৰী হিমন্ত বিশ্ব শৰ্মাই গুণোৎসৱ ২০২৫ৰ ফলাফল ঘোষণা কৰে।
ফলাফল ঘোষণাৰ পাছতে অসমৰ ৰাজ্যৰ শিক্ষামন্ত্ৰী ৰনোজ পেগুৱে ৰাজ্যৰ শিক্ষাখণ্ডৰ সাফল্যৰ ওপৰত আলোকপাত কৰে।
সামাজিক মাধ্যম এক্সযোগে মন্ত্ৰী পেগুৱে কয়, ‘ৰাজ্যজুৰি ৬ জানুৱাৰীৰ পৰা ৭ ফেব্ৰুৱাৰীলৈ তিনিটা পৰ্যায়ত অনুষ্ঠিত হোৱা গুণোৎসৱ ২০২৫ৰ ফলাফলে আমাৰ শিক্ষাখণ্ডৰ ইতিবাচক বিকাশৰ প্ৰতিফলন ঘটায়। এই মূল্যায়নত পাৰদৰ্শিতা দেখুৱাই সফলতাৰ প্ৰতিশ্ৰুতি ৰক্ষা কৰা প্ৰতিখন বিদ্যালয়ৰ কৰ্তৃপক্ষক অভিনন্দন।’
তেওঁ লগতে জানিবলৈ দিয়ে যে এইবাৰৰ গুণোসৱত ৪৪,০০৭ খন বিদ্যালয়ৰ ৩৮,৯৮,৯৪৫ গৰাকী শিক্ষাৰ্থীৰ গুণগত শৈক্ষিক মান পৰীক্ষা কৰা হৈছিল।
ইফালে, আজি শংকৰদেৱ কলাক্ষেত্ৰতে অনুষ্ঠিত হোৱা অনুষ্ঠানত এইবাৰৰ গুণোৎসৱত এ প্লাছ গ্ৰেড পোৱা ১১,৫৯৪ খন বিদ্যালয়ক ২৫ হাজাৰকৈ টকা আৰু ৪,৩২০ গৰাকী শিক্ষাৰ্থীক একোটাকৈ টেবলেটো প্ৰদান কৰে ৰাজ্য চৰকাৰে।
উল্লেখ্য যে, এইবাৰৰ গুণোৎসৱত প্ৰথম স্থানত আছে শিৱসাগৰ, দ্বিতীয় স্থানত ডিব্ৰুগড় আৰু তৃতীয় স্থান লাভ কৰে যোৰহাটে। ঐক্যসাজ শিতানত প্ৰথম শিৱসাগৰ, দ্বিতীয় মাজুলী আৰু তৃতীয় স্থান লাভ কৰে চৰাইদেউ জিলা। ইফালে স্বচ্ছ আৰু নিয়াৰিকৈ গুণোৎসৱ চলোৱা শিতানত গোলাঘাট প্ৰথম, কামৰূপ মহানগৰ দ্বিতীয় আৰু তৃতীয় স্থানত আছে যোৰহাট জিলা।
