সমগ্ৰ বিশ্বতে বৰ্তমান হিজাব বা বোৰ্কা পিন্ধা মুছলমান ছোৱালীৰ বিৰুদ্ধে বৈষম্য আৰু আপত্তিজনক আচৰণৰ ঘটনা বৃদ্ধি পাইছে। অষ্ট্ৰেলিয়াৰ পৰা পোহৰলৈ আহিছে এক চাঞ্চল্যকৰ ঘটনা, য’ত নিজেই এগৰাকী মুছলমান মহিলা সাংসদে এনে পৰিস্থিতিৰ সন্মুখীন হ’বলগীয়া হৈছিল।
এই ঘটনাই কেৱল অষ্ট্ৰেলিয়াতে নহয়, ইউৰোপত বসবাস কৰা মুছলমান মহিলাসকলৰ সুৰক্ষা আৰু সন্মানৰ ওপৰতো বহু নতুন প্ৰশ্নৰ উত্থাপন কৰিছে।
অষ্ট্ৰেলিয়াৰ এগৰাকী মুছলমান মহিলা সাংসদে প্ৰকাশ কৰিছে যে, তেওঁ ইতিমধ্যে সংসদৰ সৈতে জড়িত নিৰীক্ষণ সংস্থাত এটাত অভিযোগ দাখিল কৰিছে। মহিলা সাংসদগৰাকীয়ে কয় যে, তেওঁৰ এজন পুৰুষ সহকৰ্মীয়ে তেওঁক মদ খাবলৈ আৰু ‘টেবুলত নাচিবলৈ’ কৈছিল।
স্থানীয় সংবাদ মাধ্যমৰ মতে, আফগানিস্তানত জন্মগ্ৰহণ কৰা ফাতিমা পেইমেন অষ্ট্ৰেলিয়াৰ সংসদৰ প্ৰথমগৰাকী হিজাব পৰিধান কৰা মহিলা। পুৰুষ সহকৰ্মীজনৰ এই আচৰণৰ বিৰুদ্ধে ফাতিমাই আনুষ্ঠানিক অভিযোগো দাখিল কৰিছে।
অষ্ট্ৰেলিয়াৰ সংসদত এগৰাকী মহিলাৰ সৈতে হোৱা অসৎ আচৰণ এইটোৱেই প্ৰথম নহয়। ২০২১ চনত ব্ৰিটানি হিগিন্স নামৰ এগৰাকী মহিলা কৰ্মচাৰীয়ে কৈছিল যে, তেওঁৰ এগৰাকী সহকৰ্মীয়ে সংসদতে তেওঁৰ সৈতে অপকৰ্ম সংঘটিত কৰিছিল।
ইয়াৰ পিছত সমগ্ৰ দেশতে প্ৰতিবাদ আৰম্ভ হয়। তদন্তত পোহৰলৈ আহিছে যে সংসদত মদ খোৱা, মহিলাৰ লগত অসৎ আচৰণ কৰাটো অতি সাধাৰণ কথা। এই বিষয়টোৱে সংসদৰ পৰিবেশৰ বহু চিন্তনীয় বিষয়ো পোহৰলৈ আনিছে।
