প্ৰতি বছৰে ২ এপ্ৰিলত বিশ্ব অ’টিজিম সজাগতা দিৱস পালন কৰা হয়। এই দিনটো উদযাপন কৰা মূলতে অ’টিজিমৰ বিষয়ে মানুহৰ মাজত সজাগতা বৃদ্ধি কৰা আৰু এই ৰোগত আক্ৰান্ত শিশুসকলে যাতে উন্নত চিকিৎসা লাভ কৰে তাক নিশ্চিত কৰা । অ’টিজিম হৈছে স্নায়ুজনিত ৰোগ। শৈশৱৰ পৰাই ইয়াৰ লক্ষণ দেখা দিবলৈ আৰম্ভ কৰে। এই ৰোগত আক্ৰান্ত ব্যক্তিৰ যিকোনো কাম শিকিব পৰা, কাৰোবাৰ লগত যোগাযোগ কৰিব পৰা আৰু কাম কৰাৰ ক্ষমতা হ্ৰাস পোৱাৰ দৰে লক্ষণে দেখা যায়। জিনীয় কাৰণত এই ৰোগ হয়।
অ’টিজিম ৰোগীসকলে বিভিন্ন ধৰণে চিন্তা কৰে আৰু আচৰণ কৰে। স্বাভাৱিক শিশুতকৈ এই ৰোগত আক্ৰান্ত শিশুসকলৰ আচৰণ বেলেগ। জন্মৰ মাত্ৰ এবছৰৰ পিছত এই ৰোগৰ লক্ষণ দেখা দিবলৈ আৰম্ভ কৰে। এপ’ল’ হাস্পতালৰ স্নায়ুবিজ্ঞান বিভাগৰ জ্যেষ্ঠ পৰামৰ্শদাতা ডাঃ অনিমেশ গুপ্তাই কয় যে, অ’টিজিম ৰোগত আক্ৰান্ত শিশুসকলক বিশেষ মনোযোগ দিয়াৰ প্ৰয়োজন। সময়োপযোগী আৰু শুদ্ধ চিকিৎসাৰ দ্বাৰা এই ৰোগত আক্ৰান্ত শিশুক কিছু পৰিমাণে স্বাভাৱিক অৱস্থালৈ আনিব পাৰি।
ডাঃ অনিমেশ গুপ্তাই কয় যে, অ’টিজিম ৰোগত আক্ৰান্ত শিশুৰ চকুৰ সংস্পৰ্শত অসুবিধা হয়। এই ৰোগত আক্ৰান্ত শিশুৱে প্ৰায়ে আপোনাৰ ফালে চকু ঘূৰাই নিদিয়ে বা চকুৱে চকুৱে চাব নোৱাৰে । কাৰোবাক চাই হাঁহি দিয়া বা হাত জোকাৰি দিয়াৰ দৰে কামবোৰ তেওঁলোকে কৰিবলৈ সক্ষম নহয়। তেওঁলোকৰ মগজুৰ সঠিক বিকাশ নোহোৱাৰ বাবে এনে হয়।
লগতে আন শিশুৰ তুলনাত তেওঁলোকে কথা ক’বলৈ অসুবিধাৰ সন্মুখীন হয়। যদি আপুনি আপোনাৰ শিশুৰ ক্ষেত্ৰত এনে লক্ষণ লক্ষ্য কৰে তেন্তে লগে লগে চিকিৎসকৰ পৰামৰ্শ লওক। এজন শিশু চিকিৎসক আৰু এজন স্নায়ু বিশেষজ্ঞৰ সৈতে যোগাযোগ কৰিব লাগে।
ঔষধ আৰু চিকিৎসাৰ দ্বাৰা অ’টিজিম নিয়ন্ত্ৰণ কৰিব পাৰি, কিন্তু এই ৰোগ সম্পূৰ্ণৰূপে আৰোগ্য কৰিব নোৱাৰি। কিন্তু সময়মতে লক্ষণ চিনাক্ত কৰি ইয়াক নিয়ন্ত্ৰণ কৰিব পৰা যায় আৰু ৰোগীয়ে কিছু পৰিমাণে স্বাভাৱিক জীৱন যাপন কৰিব পাৰে।
