২০২৬ চনৰ এপ্ৰিল মাহত বাংলাদেশত সাধাৰণ নিৰ্বাচন অনুষ্ঠিত হ’ব বুলি শুকুৰবাৰে ঘোষণা কৰে অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে। কিন্তু খালেদা জিয়াৰ এই সিদ্ধান্তত সুখী নহ’ল খালেদা জিয়াৰ বাংলাদেশ জাতীয়তাবাদী পাৰ্টি।
বিএনপিয়ে ২০২৫ চনৰ ডিচেম্বৰ মাহত নিৰ্বাচন আয়োজন কৰা সম্ভৱ বুলি কয়।তাৰ বাবে ২০২৬ চনৰ এপ্ৰিল মাহলৈ অপেক্ষা কৰিব নালাগে। বিএনপিৰ প্ৰধান সম্পাদক মিৰ্জা ফখৰুল ইছলাম আলমগীৰ বিএনপিৰ প্ৰতিষ্ঠাপক জিয়াউৰ ৰহমানৰ সমাধিস্থলত ঈদ-উল-ফিতৰ উপলক্ষে শ্ৰদ্ধাঞ্জলি জনাবলৈ গৈছিল। তাতেই তেওঁ কয় যে, ডিচেম্বৰ মাহ নিৰ্বাচনৰ উপযুক্ত সময়। ইয়াৰ পূৰ্বেও এই দলটোৱে এক বিবৃতিত একে দাবী উত্থাপন কৰিছে।
ইয়াৰ মূলতঃ তিনিটা কাৰণ উল্লেখ কৰিছে বিএনপিয়ে। প্ৰথমতে তেওঁলোকে দাবী কৰে যে, এপ্ৰিল মাহৰ বতৰ নিৰ্বাচনৰ বাবে অনুকূল নহয়। সেই সময়ত গৰম বেছি হোৱাৰ বাবে কম চাপ আৰু ধুমুহাৰ আশংকাও থাকে।
দ্বিতীয়তে, ভোটদানৰ বাবে নিৰ্ধাৰিত সময় ৰমজান মাহৰ ঠিক পিছতেই। ফলত ৰোজাৰ সময়ছোৱাত নিৰ্বাচনী প্ৰচাৰ চলাব লাগিব। যিয়ে ৰাজনৈতিক দলসমূহৰ বাবে সমস্যাৰ সৃষ্টি কৰিব পাৰে।
তৃতীয়তে, এপ্ৰিল মাহত বাংলাদেশত একাধিক পৰীক্ষা হয়। বিএনপিয়েও সেই কথা মনত ৰাখিবলৈ অনুৰোধ জনাইছে। দশম আৰু দ্বাদশ পৰীক্ষাৰ বাবেও নিৰ্বাচনত সমস্যাৰ সৃষ্টি হ’ব পাৰে।
এইবোৰ কথা মনত ৰাখি বিএনপিয়ে দাবী কৰিছে যে, ডিচেম্বৰ মাহত ভোটদানৰ বাবে আদৰ্শ আৰু উপযুক্ত সময়। ইয়াৰ ফলত ৰাইজৰ সমস্যা হ্ৰাস পাব। বাংলাদেশৰ সংবাদ মাধ্যমৰ এক প্ৰতিবেদন অনুসৰি, মীৰ্জা ফখৰুলে শনিবাৰে কয় যে, নিৰ্বাচনৰ বাবে যি সময় নিৰ্ধাৰণ কৰা হৈছে, বাংলাদেশত নিৰ্বাচনৰ বাবে সেয়া উপযুক্ত সময় নহয়। সেই সময়ত গৰম অতিপাত হয় আৰু ধুমুহাৰো সম্ভাৱনা থাকে। সেই সময়টো ৰমজানৰ ঠিক পিছতেই।পৰীক্ষাও আছে।সেয়েহে ডিচেম্বৰ মাহত নিৰ্বাচন অনুষ্ঠিত হোৱাটো তেওঁলোকে উপযুক্ত বুলি ভাৱে।
২০২৪ চনৰ আগষ্ট মাহত জনসাধাৰণৰ তীব্ৰ প্ৰতিবাদৰ হেঁচাত শ্বেখ হাছিনাই বাংলাদেশৰ প্ৰধানমন্ত্ৰীৰ পদৰ পৰা পদত্যাগ কৰিছিল। ইয়াৰ পিছত নোবেল বিজয়ী ইউনুছৰ নেতৃত্বত বাংলাদেশত ৮ আগষ্টত অন্তৱৰ্তীকালীন চৰকাৰ গঠন কৰা হয়। কোৱা হৈছিল যে বাংলাদেশত প্ৰয়োজনীয় সংস্কাৰ কৰি অন্তৱৰ্তীকালীন চৰকাৰে সাধাৰণ নিৰ্বাচনৰ আয়োজন কৰিব আৰু গণতন্ত্ৰ প্ৰতিষ্ঠা হ’ব। সেই নিৰ্বাচনত পলম হোৱাক লৈ ৰাজনৈতিক দলসমূহে ক্ষোভ প্ৰকাশ কৰিছে।
