বাংলাদেশত শ্বেখ হাছিনাৰ চৰকাৰৰ পতনৰ পিছত মহম্মদ ইউনুছৰ নেতৃত্বত এখন অন্তৱৰ্তীকালীন চৰকাৰ গঠন কৰা হয়। কিন্তু চৰকাৰ গঠনৰ পিছৰে পৰা বাংলাদেশত সংখ্যালঘু হিন্দুৰ ওপৰত অত্যাচাৰ ক্ৰমাগতভাৱে বৃদ্ধি পাইছে।
অৱশ্যে ইউনুছে এই কথা কেতিয়াও স্বীকাৰ কৰা নাই। বৰঞ্চ এইক্ষেত্ৰত ভাৰতকহে দোষাৰোপ কৰিছে। তেওঁ হিন্দুৰ ওপৰত চলি থকা অত্যাচাৰৰ বাতৰিক সম্পূৰ্ণ ভুৱা আখ্যা দিছে। ইউনুছে বাংলাদেশৰ হিন্দু সমাজলৈও এক বিশেষ বাৰ্তা প্ৰদান কৰি তেওঁলোকক হিন্দু বুলি নক’বলৈ আহ্বান জনায়।
এক প্ৰতিবেদন অনুসৰি, সংখ্যালঘু হিন্দুসকলৰ ওপৰত হোৱা আক্ৰমণ আৰু তেওঁলোকৰ সুৰক্ষাৰ বিষয়ে কোৱাৰ সময়ত মহম্মদ ইউনুছে কয় যে, তেওঁলোকক হিন্দু সম্প্ৰদায় হিচাপে দেখাৰ আগতে তেওঁলোকে নিজকে বাংলাদেশৰ নাগৰিক হিচাপে চাব লাগে। এই পন্থাই সৰ্বাংগীনতা আৰু ঐক্যক উজ্জ্বল কৰি তুলিব।
বাংলাদেশৰ হিন্দুসকলে কেতিয়াও বিচ্ছিন্নতা অনুভৱ কৰিব নালাগে বুলিও তেওঁ কয়। ইউনুছে তেওঁলোকক নাগৰিক হিচাপে নিজৰ অধিকাৰ দাবী কৰিবলৈ পৰামৰ্শ দিয়ে। হিন্দুসকলৰ ওপৰত আক্ৰমণ আৰু অত্যাচাৰৰ ঘটনা সন্দৰ্ভত কোৱাৰ সময়ত নোবেল বঁটা বিজয়ী অৰ্থনীতিবিদগৰাকীয়ে কয় যে, বেছিভাগ ঘটনাৰ কাৰণ হৈছে ভূমিক লৈ স্থানীয় বিবাদ বা চুবুৰীয়া দেশৰ মাজত হোৱা সমস্যা, যিবোৰক সাম্প্ৰদায়িক সমস্যা হিচাপে চিত্ৰিত কৰা হয়।
