আই পি এলৰ খিতাপ দখলৰ পিছতেই বাংগালুৰু এন চিন্নাস্বামী ক্ৰিকেট ষ্টেডিয়ামত আয়োজন কৰা বিজয় উৎসৱ ৰেলীত হোৱা পদপিষ্টৰ ঘটনাক লৈ বিপদ বাঢ়িছে আৰ চি বিৰ। বিজয় উৎসৱ ৰেলীত হোৱা পদপিষ্টৰ ঘটনাৰ বাবে ৰয়েল চেলেঞ্জাৰ্ছ বাংগালুৰুকে দোষাৰোপ কৰিছে কেন্দ্ৰীয় প্ৰশাসনিক ন্যায়াধিকৰণে।
৪ জুনত আয়োজন কৰা বিজয় উৎসৱ ৰেলীত অভাৱনীয় ভিৰৰ বাবে হোৱা পদপিষ্টৰ ঘটনাত ১১ গৰাকী লোকৰ মৃত্যু হোৱাৰ লগতে আন কেইবাজনো গুৰুতৰভাৱে আহত হৈছিল।
ইফালে, এই সমগ্ৰ ঘটনাক লৈ সমালোচনাৰ সন্মুখীন হোৱা আৰক্ষীৰ পক্ষত থাকি ন্যায়াধিকৰণে কয় যে আৰক্ষীও মানুহ, তেওঁলোক ‘ভগৱান’ নহয়, ‘যাদুকৰ’ নহয় আৰু তেওঁলোকৰ হাতত ‘আলাউদ্দিনৰ চাকি’ও নাই।
উল্লেখ্য যে, আৰ চি বিয়ে প্ৰথমবাৰৰ বাবে আই পি এলৰ খিতাপ দখলৰ পাছতেই দলটোক সন্মান জনোৱাৰ উদ্দেশ্যে ৪ জুনত বাংগালুৰুত আয়োজন কৰা হৈছিল বিজয় উৎসৱ। এই সময়তে এম চিন্নাস্বামী ষ্টেডিয়ামৰ সন্মুখত অজস্ৰ লোকৰ সমাগম হোৱাত এক অভাৱনীয় পৰিৱেশৰ সৃষ্টি হয় আৰু পৰিস্থিতি নিয়ন্ত্ৰণৰ বাহিৰত যোৱাত ১১ গৰাকী লোকৰ মৃত্যু হয় আৰু ৫০ৰো অধিক লোক গুৰুতৰভাৱে আহত হয়।
এই ঘটনাৰ পিছতে আৰ চি বি মেনেজমেণ্ট যথেষ্ট সমালোচনাৰ সন্মুখীন হৈছিল আৰু আৰক্ষীয়ে ব্যাপক তৎপৰতা গ্ৰহণ কৰি আৰ চি বিৰ শীৰ্ষ বিষয়াকে ধৰি মুঠ চাৰিজন লোকক গ্ৰেপ্তাৰ কৰিছিল।
