আজি ৯ জুলাইত সমগ্ৰ দেশতে ভাৰত বন্ধৰ ব্যাপক প্ৰভাৱ দেখা যায়। কেন্দ্ৰীয় চৰকাৰৰ নীতি-নিয়মৰ বিৰুদ্ধে প্ৰতিবাদ সাব্যস্ত কৰিছে প্ৰতিবাদকাৰী সংগঠনসমূহে, যিটো নীতি-নিয়মক শ্ৰমিক বিৰোধী, কৃষক বিৰোধী আৰু কৰ্পৰেট সমৰ্থক বুলি গণ্য কৰা হয়।
এই ধৰ্মঘটত বেংকিং, পৰিবহণ, ডাক সেৱা, কয়লা খনন আৰু নিৰ্মাণ খণ্ডৰ প্ৰায় ২৫ কোটি কৰ্মচাৰী আৰু গ্ৰাম্য শ্ৰমিকে অংশগ্ৰহণ কৰিছে। ইয়াৰ ফলত বহু ৰাজ্যৰ ৰাজহুৱা সেৱাত প্ৰভাৱ পৰাৰ সম্ভাৱনা আছে।
বিদ্যালয়, মহাবিদ্যালয় আৰু ব্যক্তিগত কাৰ্যালয়সমূহ স্বাভাৱিকভাৱে খোলা থাকিব বুলি আশা কৰা হৈছে যদিও পৰিবহণ, বেংক আৰু ডাক সেৱাত ব্যাঘাত জন্মালে স্বাভাৱিক জীৱনত প্ৰভাৱ পৰিব পাৰে।
ভাৰত বন্ধই বিদ্যুৎ যোগানতো প্ৰভাৱ পেলাব পাৰে। বিদ্যুৎ খণ্ডৰ সৈতে জড়িত ২৭ লাখৰো অধিক কৰ্মচাৰীয়ে এই দেশজোৰা ধৰ্মঘটত যোগদান কৰিবলৈ ওলাইছে, যাৰ ফলত বহু ৰাজ্যত বিদ্যুৎ যোগানত ব্যাঘাত জন্মিব পাৰে।
ট্ৰেড ইউনিয়নৰ মতে কেন্দ্ৰীয় চৰকাৰৰ শ্ৰমিক বিৰোধী নীতিৰ বিৰুদ্ধে আয়োজন কৰা এই ধৰ্মঘটত বিদ্যুৎ শ্ৰমিকৰ বৃহৎ পৰিসৰৰ অংশগ্ৰহণ থাকিব। এনে পৰিস্থিতিত বহু ক্ষেত্ৰত বিদ্যুৎ কৰ্তন অথবা সেৱাত ব্যাঘাত জন্মোৱাৰ সম্ভাৱনা আছে।
ৰে’ল সংঘই ভাৰত বন্ধত অংশগ্ৰহণৰ কথা আনুষ্ঠানিকভাৱে ঘোষণা কৰা নাই যদিও এই ধৰ্মঘটৰ ফলত ৰে’ল সেৱাত পৰোক্ষ প্ৰভাৱ পৰিব পাৰে। সমগ্ৰ ৰে’ল নেটৱৰ্ক স্থবিৰ হৈ পৰাৰ কোনো সম্ভাৱনা নাই, তথাপিও কিছুমান পথত ৰে’ল চলাচলত পলম হ’ব পাৰে, প্লেটফৰ্মত ভিৰ হ’ব পাৰে বা স্থানীয় অৱৰোধ হ’ব পাৰে। যাত্ৰীসকলক যাত্ৰাৰ পূৰ্বে নিজৰ পথৰ অৱস্থা পৰীক্ষা কৰিবলৈ পৰামৰ্শ দিয়া হৈছে।
এই ধৰ্মঘটৰ নেতৃত্ব দিয়া ১০টা কেন্দ্ৰীয় ট্ৰেড ইউনিয়ন আৰু কৃষক সংগঠনে কয় যে কেন্দ্ৰীয় চৰকাৰৰ নীতি শ্ৰমিক বিৰোধী, কৃষক বিৰোধী আৰু কৰ্পৰেট সমৰ্থক। চৰকাৰৰ সন্মুখত ৯টা ডাঙৰ দাবী উত্থাপন কৰিছে।
- চাৰিখন নতুন শ্ৰম সংহিতা প্ৰত্যাহাৰ কৰিব লাগে।
- যুৱক-যুৱতীসকলৰ বাবে কৰ্মসংস্থাপন সৃষ্টি আৰু চৰকাৰী খালী পদসমূহ তৎকালীনভাৱে পূৰণ কৰিব লাগে।
- প্ৰতিমাহে নূন্যতম ২৬ হাজাৰ টকা মজুৰি নিশ্চিত কৰিব লাগে।
- পুৰণি পেঞ্চন আঁচনি (OPS) পুনৰুদ্ধাৰ কৰিব লাগে।
- ৮ ঘণ্টীয়া কৰ্মদিনৰ নিশ্চয়তা থাকিব লাগে।
- এম জি এনৰেগা চহৰ অঞ্চললৈ সম্প্ৰসাৰিত কৰিব লাগে।
- অগ্নিপথ আঁচনি বাতিল কৰিব লাগে।
- ধৰ্মঘট আৰু সংঘ গঠনৰ অধিকাৰ সুৰক্ষিত কৰিব লাগে।
- স্বাস্থ্য আৰু শিক্ষাৰ দৰে ৰাজহুৱা সেৱাসমূহ শক্তিশালী কৰিব লাগে।
