অসম আন্দোলনক সন্মুখৰ পৰা নেতৃত্ব দি অসম গণ পৰিষদ দলৰ জৰিয়তে ৰাজ্যৰ ৰাজনীতিত প্ৰৱেশ কৰা প্ৰাক্তন গৃহমন্ত্ৰী ভৃগু ফুকনৰ একমাত্ৰ কন্যা উপসা ফুকনৰ মৃত্যু হৈছে। উজান বজাৰৰ খাৰঘূলিত থকা দুমহলীয়া অট্টালিকাৰ পৰা পৰি ৰহস্যজনক মৃত্যু হয় উপসা ফুকনৰ।
দেওবাৰে ৰাতিপুৱা প্ৰায় ৭.৫৫ মিনিটত এই কৰুণ ঘটনাটো সংঘটিত হয়। এই ঘটনাৰ খবৰ লাভ কৰাৰ পিছতেই ঘটনাস্থলত লতাশিল থানাৰ আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে গুৱাহাটী মেডিকেল কলেজ হাস্পতাললৈ প্ৰেৰণ কৰে।
পিতৃ ভৃগু ফুকনৰ মৃত্যুৰ পিছৰে পৰা খাৰঘূলিত থকা তেওঁলোকৰ বাসগৃহত মাতৃৰ সৈতে একেলগে আছিল উপসা ফুকন। এয়া আত্মহত্যা নে আন কিবা সেই কথা এতিয়াও জানিব পৰা হোৱা নাই।
মৰণোত্তৰ পৰীক্ষাৰ লগতে আৰক্ষীৰ তদন্তৰ পিছতহে প্ৰকৃত সত্য পোহৰলৈ আহিব।
উল্লেখ্য এগৰাকী প্ৰতিভাশালী যুৱতীৰ এইদৰে দুৰ্ভাগ্যজনক মৃত্যুৰ পিছতে অসম গণ পৰিষদ দলৰ নেতা মনোজ শইকীয়া খাৰঘূলিস্থিত বাসগৃহত উপস্থিত হৈ গভীৰ শোকপ্ৰকাশ কৰাৰ লগতে শোকসন্তপ্ত পৰিয়ালক গভীৰ সমবেদনা জ্ঞাপন কৰে।
