নলবাৰী, ধুবুৰী, গোৱালপাৰা, গোলাঘাটৰ উৰিয়ামঘাটৰ পিছত এইবাৰ বিশ্বনাথত চলিব উচ্ছেদ অভিযান। দেওবাৰে বিশ্বনাথৰ ননকে জাপৰিগুৰিৰ ১৭০ বিঘা ভূমিত বসবাস কৰি থকা ৩০৭ টা পৰিয়ালৰ ঘৰত চলিব বৃহৎ উচ্ছেদ।
ইতিমধ্যে এই উচ্ছেদ চলোৱাৰ বাবে বিশ্বনাথ জিলা প্ৰশাসনে সম্পূৰ্ণ কৰি তুলিছে প্ৰস্তুতি। উচ্ছেদৰ বাবে জিলা প্ৰশাসনে শ-শ বুলড’জাৰ উচ্ছেদস্থলীৰ সমীপত সাজু কৰি ৰাখিছে।
ইফালে উচ্ছেদক লৈ প্ৰশাসনৰ তৎপৰতা দেখি হাহাকাৰ অৱস্থাৰ সৃষ্টি হৈছে বেদখলকাৰীৰ মাজত। সংবাদ মাধ্যমৰ আগত নিজৰ মনৰ দুখ বেদনা উল্লেখ কৰি একাংশ বেদখলকাৰীয়ে কয়, ‘কংগ্ৰেছৰ বাবেই আমি এতিয়া গৃহহীন। কংগ্ৰেছে মিছা মাতি ভোট লৈছিল আমাৰ পৰা। আমাৰ মাটি-বাৰী একো নাই, এতিয়া ক’ত যাম।’
এই পৰিস্থিতিৰ বাবে কংগ্ৰেছ দায়ী বুলি মন্তব্য কৰি দখলকাৰীয়ে সংবাদ মাধ্যমৰ আগত হুকহুকাই কন্দাও পৰিলক্ষিত হয়।
উল্লেখ্য যে, এই চৰকাৰী খাচ আৰু গো চৰনীয়া পথাৰ (ভি জি আৰ)কেৱল বিশ্বনাথ ৰাজহ চক্ৰতেই প্ৰায় ৪৪ হাজাৰ বিঘা ভূমি আছে বেদখলকাৰীৰ কবলত। অৱশ্যে ইয়াৰে একাংশই মিছন বসুন্ধৰাৰ জৰিয়তে ভূমি স্বত্ব লাভ কৰাৰ সম্ভাৱনা আছে।
