শুকুৰবাৰে পঞ্জাৱৰ বাথিণ্ডাত মুষলধাৰ বৰষুণৰ মাজতে এখন দলঙৰ পৰা বাগৰি পৰে এখন বাছ। এই দুৰ্ঘটনাটোৰ ফলত বাছখনত যাত্ৰা কৰা ৮ জন লোকৰ মৃত্যু হোৱা বুলি জানিব পৰা গৈছে।
দলংখনত ৰেলিং নোহোৱাৰ বাবেই এই দুৰ্ঘটনাটো সংঘটিত হোৱা বুলি সন্দেহ প্ৰকাশ কৰা হৈছে।
দুৰ্ঘটনাটোৰ তথ্য লাভ কৰাৰ পিছতে সেই স্থানত উপস্থিত হয় আৰক্ষী আৰু প্ৰশাসনৰ দল। স্থানীয় লোকেও সেই স্থানত উপস্থিত হৈ সাহায্য আৰু উদ্ধাৰৰ কাম কৰে। এই দুৰ্ঘটনাত বহু লোকো আহত হয়। আহত লোককেইজনক ওচৰৰ চিকিৎসালয়লৈ লৈ যোৱা হয়, য’ত তেওঁলোকৰ চিকিৎসা অব্যাহত আছে।
দুৰ্ঘটনাটোৰ পিছত ঘটনাস্থলত উপস্থিত হোৱা বিষয়াসকলে জানিব দিয়া অনুসৰি, ৩০ জনতকৈ অধিক যাত্ৰী লৈ তালৱাণ্ডী ছাবোৰ পৰা বাথিণ্ডালৈ গৈ আছিল বাছখন।
বাথিণ্ডা-শ্বাৰ্দুলগড় পথত এটা ব্যক্তিগত পৰিবহণ কোম্পানীৰ বাছখন দুৰ্ঘটনাগ্ৰস্ত হয়। দুৰ্ঘটনাটো কেনেকৈ সংঘটিত হ’ল সেয়া এতিয়াও স্পষ্ট হোৱা নাই। ২৪ জন যাত্ৰীৰ অৱস্থা সংকটজনক বুলি জানিব পৰা গৈছে।
প্ৰতিকূল বতৰৰ বাবে বাছখনে নিয়ন্ত্ৰণ হেৰুৱাই পথৰ পৰা পিছলি গৈ দলঙৰ তলত পৰে বুলি সন্দেহ কৰা হৈছে।
