শিক্ষকতাৰ পৱিত্ৰ বৃত্তিত চূড়ান্ত কালিমা সানিলে এগৰাকী প্ৰধান শিক্ষকে। শ্ৰেণীৰ কোঠাৰ ভিতৰতে হঠাতে মাটিত শুই পৰিল এগৰাকী প্ৰধান শিক্ষক।
পিছে শ্ৰেণী কোঠাত প্ৰধান শিক্ষক গৰাকী হঠাতে এইদৰে শুই পৰাৰ কাৰণ জানি আচৰিত হব আপুনি। তেওঁ এনেকৈ শ্ৰেণী কোঠাত হঠাতে শুই পৰিল, কিয়নো তেওঁ অত্যাধিক মদ্যপান কৰি আহিছিল। যাৰবাবে ছাৰে নিজকে নিয়ন্ত্ৰণ কৰিব নোৱাৰি, পাঠদান কৰাই থকাৰ মাজতেই শ্ৰেণীকোঠাৰ মাটিত শুই পৰে৷
এই ঘটনা কাছাৰ জিলাৰ নৰসিংপুৰ শিক্ষাখণ্ডৰ ৯৫৮নং উত্তৰ ৰাখালটিলা এল.পি স্কুলৰ। মদ্যপান কৰি মাটিত শুই পৰা শিক্ষক গৰাকী হৈছে বিদ্যালয়খনৰ প্ৰধান শিক্ষক। তেওঁৰ নাম হৈছে আলতাফ হুছেইন লস্কৰ।
এই ঘটনাৰ খৱৰ পাই স্থানীয় লোকসহ অভিভাৱক সকলো বিদ্যালয়ত উপস্থিত হৈ মাতাল ছাৰক উঠোৱাৰ চেষ্টা চলায় যদিও বিফল হয় সকলো। অভিভাৱক সকলে “অ’ ছাৰ উঠক, অ’ ছাৰ উঠক” বুলি মতাৰ পাছতো মাটিত এইদৰে সুখনিদ্ৰাত ব্যস্ত থাকে শিক্ষক গৰাকী । পিছে মদৰ নিচা কিছু কম হোৱাৰ পাছত ছাৰৰ সুখনিদ্ৰা ভংগ হয়।
পিছে টোপনি ভংগ হোৱাৰ পাছত কেমেৰা দেখি খং উঠি যায় ছাৰৰ। বিনা অনুমতিত বিদ্যালয়ত প্ৰৱেশ কৰাৰ বাবে অভিভাৱকসহ স্থানীয় ৰাইজৰ সৈতে তৰ্কা-তৰ্কিত লিপ্ত হয়।
বিদ্যালয়খনৰ ছাত্ৰছাত্ৰী সহ অভিভাৱক সকলৰ অভিযোগ মতে, আলতাফ হুছেইন নামৰ প্ৰধান শিক্ষক গৰাকীয়ে প্ৰতিদিনেই মদ্যপান কৰি বিদ্যালয়ত প্ৰৱেশ কৰে। আনকি বিদ্যালয়ৰ ভিতৰত কণকণ ছাত্ৰছাত্ৰীৰ সম্মুখতো মদ্যপান কৰে এইগৰাকী প্ৰধান শিক্ষকে। প্ৰধান শিক্ষক গৰাকীয়ে বিদ্যালয়ত প্ৰত্যেক দিনেই ছাত্ৰছাত্ৰীৰ সম্মুখত মদ্যপান কৰি থাকে বুলি কেমেৰাৰ সম্মুখত নিজ মূখে জনাই বিদ্যালয়খনৰ কণকণ ছাত্ৰছাত্ৰী সকলে।
বিগত কেইবাবছৰ ধৰি এইদৰে প্ৰত্যেক দিনেই মদ্যপান কৰি বিদ্যালয়ত প্ৰধান শিক্ষক গৰাকী আহে, যাৰ ফলত বিদ্যালয়ৰ শিক্ষিক পৰিবেশ বিনষ্ট হৈ পৰিছে৷ এই সন্দৰ্ভত শিক্ষা বিভাগ সম্পূৰ্ণ অৱগত যদিও আজি পৰ্যন্ত মদাহী প্ৰধান শিক্ষক গৰাকীৰ বিৰুদ্ধে কোনো ব্যবস্থা গ্ৰহণ নকৰাৰ অভিযোগ অভিভাৱক সহ স্থানীয় ৰাইজৰ।
