২৫ ফেব্ৰুৱাৰীৰ পৰা দুদিনীয়াকৈ অনুষ্ঠিত হোৱা ‘এডভাণ্টেজ আছাম ২.০- বিনিয়োগ আৰু আন্তঃগাঁথনি সন্মিলনৰ’ অন্তিম দিনা কেন্দ্ৰীয় মন্ত্ৰী সৰ্বানন্দ সোণোৱালে ৰাজ্যৰ আভ্যন্তৰীণ জলপথ খণ্ডৰ সৰ্বাংগীন উন্নয়নৰ বাবে কেতবোৰ ডাঙৰ ঘোষণা কৰিছে। ৰাজ্যখনত অহা পাঁচ বছৰৰ ভিতৰত ৪,৮০০ কোটি টকাৰ বিনিয়োগ কৰিব বুলি বুধবাৰে ঘোষণা কৰে কেন্দ্ৰীয় বন্দৰ, জাহাজ আৰু জলপথ মন্ত্ৰী সোণোৱালে।
ৰাজ্যখনৰ পথ, ৰে’ল আৰু নদীৰ আন্তঃগাঁথনি সন্দৰ্ভত এডভান্টেজ আছাম ২.০ বিনিয়োগ সন্মিলনৰ আয়োজিত এক অধিৱেশনত মন্ত্ৰী সোণোৱালে কয়, ‘মই ঘোষণা কৰিব বিচাৰো যে আগন্তুক পাঁচ বছৰত অসমত মোৰ মন্ত্ৰালয়ে ৪৮০০ কোটি টকা খৰচ কৰিব’।
জাহাজ মেৰামতিৰ সুবিধা নিৰ্মাণ, বন্দৰৰ বাবে বিকল্প পথ নিৰ্মাণ আৰু টাৰ্মিনেল উন্নয়ন আদিৰ বাবে এই ধনৰাশি ব্যৱহাৰ কৰা হ’ব বুলিও উল্লেখ কৰে সোণোৱালে।
কেন্দ্ৰীয় মন্ত্ৰীগৰাকীয়ে লগতে কয় যে, ৰাজ্যত সামুদ্ৰিক শিক্ষাৰ ক্ষেত্ৰতো উৎকৃষ্টতাৰ কেন্দ্ৰ স্থাপন কৰা হ’ব। এই কেন্দ্ৰ স্থাপনৰ ফলত বছৰি ৫ হাজাৰ দক্ষ যুৱকে জাহাজ উদ্যোগত নিয়োগৰ সুযোগ লাভ কৰিব।
বিনিয়োগৰ কথা উল্লেখ কৰি সোণোৱালে সামাজিক মাধ্যমত লিখিছে, ‘মাননীয় মুখ্যমন্ত্ৰী ড° হিমন্ত বিশ্ব শৰ্মা, অসম চৰকাৰৰ মাননীয় মন্ত্ৰী শ্ৰী কৃষ্ণেন্দু পাল, ভাৰতস্থিত ছিংগাপুৰৰ সন্মানীয় উচ্চায়ুক্ত ছাইমন ৱং আৰু উদ্যোগ খণ্ডৰ গণ্য-মান্য ব্যক্তিসকলৰ উপস্থিতিত আজি গুৱাহাটীত “এডভাণ্টেজ আছাম ২.০”ৰ পথ, ৰে’লৱে আৰু নদীকেন্দ্ৰিক আন্তঃগাঁথনি আলোচনা-চক্ৰত অংশগ্ৰহণ কৰি আনন্দিত হৈছোঁ।’
মাননীয় প্ৰধানমন্ত্ৰী শ্ৰী নৰেন্দ্ৰ মোদী ডাঙৰীয়াৰ “এক্ট ইষ্ট নীতি”য়ে কেনেদৰে আমাৰ জলপথত ৰূপান্তৰমুখী আন্তঃগাঁথনি গঢ়ি তুলিছে, পূৰ্বতে বাস্তৱায়িত নোহোৱা মাল্টি-মডেল লজিষ্টিক আৰু কাৰ্গ’ চলাচল এতিয়া সুচল কৰিছে, অসমক বিনিয়োগ আৰু বিকাশৰ অন্যতম প্ৰাণকেন্দ্ৰ হিচাপে গঢ়ি তুলিছে, সেই সন্দৰ্ভত বিস্তাৰিতভাৱে আলোকপাত কৰোঁ। সামাজিক মাধ্যমত এই কথাও উল্লেখ কৰে মন্ত্ৰী সোণোৱালে।
