১১ এপ্ৰিলত নিশা প্ৰায় ১২.১৫ বজাত ছত্তীশগড়ৰ ৰাজধানী ৰায়পুৰ-বালোদাবজাৰ সংলগ্ন মূল পথত সংঘটিত হয় ভয়ংকৰ পথ দুৰ্ঘটনা।এই দুৰ্ঘটনাত ১৪ জন লোক নিহত হোৱাৰ লগতে ৩০ জনতকৈ অধিক আহত হয়। এই আহতসকলক ৰায়পুৰ চিকিৎসালয়লৈ অনা হয়।
বিবাহ অনুষ্ঠানত অংশ লৈ গাড়ীৰে ঘৰলৈ উভতি আহি থকা অৱস্থাত সংঘটিত হয় এই দুৰ্ঘটনা। দুৰ্ঘটনাটোত আহত একাংশৰ অৱস্থা অতি গুৰুতৰ। প্ৰাণ হেৰুওৱাসকলৰ ভিতৰত অধিকাংশই মহিলা।
তথ্য অনুসৰি, সৰগাঁৱৰ সমীপত সন্মুখৰ পৰা আহি থকা এখন তীব্ৰবেগী ট্ৰেইলাৰে ভুক্তভোগীসকলৰ বাহনখনক জোৰেৰে খুন্দা মাৰে। এই সংঘৰ্ষ ইমানেই ভয়াৱহ আছিল যে বাহনখনত থকা বহু লোকৰ থিতাতে প্ৰাণহানি হয়। এই সকলৰ ভিতৰত ৪টা শিশুও আছে।
দুৰ্ঘটনা সংঘটিত হোৱাৰ সময়ত বাহনখনত ৫০ জনতকৈ অধিক লোক আছিল। দুৰ্ঘটনা সংঘটিত হোৱাৰ পিছত সেই স্থানত চিঞৰ-বাখৰ লাগে। ঘটনাস্থলীত আৰক্ষী উপস্থিত হৈ আৱদ্ধসকলক স্থানীয় লোকৰ সহায়ত উদ্ধাৰ কৰা হয়।
আহতসকলক ততাতৈয়াকৈ খাৰোৰা সামূহিক স্বাস্থ্য কেন্দ্ৰ আৰু ৰায়পুৰ চিকিৎসা মহাবিদ্যালয়লৈ প্ৰেৰণ কৰা হয়। একাংশৰ অৱস্থা বৰ্তমান সংকটজনক হৈ আছে।
ইতিমধ্যে আৰক্ষীয়ে এই ঘটনাৰ উচিত তদন্ত অব্যাহত ৰাখিছে।
