২৪ অক্টোবৰ অৰ্থাৎ বৃহস্পতিবাৰে জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই প্ৰধানমন্ত্ৰী নৰেন্দ্ৰ মোদীক সাক্ষাৎ কৰে। যোৱা সপ্তাহত কাৰ্যভাৰ গ্ৰহণ কৰাৰ পিছতেই ওমৰ আব্দুল্লাৰ এইটোৱেই প্ৰথম দিল্লী ভ্ৰমণ।
প্ৰধানমন্ত্ৰী মোদীৰ পূৰ্বে ওমৰ আব্দুল্লাই কেন্দ্ৰীয় গৃহমন্ত্ৰী অমিত শ্বাহ আৰু ৰাজনাথ সিঙকো সাক্ষাৎ কৰে।
কেন্দ্ৰীয় শাসিত প্ৰশাসনৰ কাম-কাজ সুকলমে পৰিচালনা কৰাত কেন্দ্ৰৰ পৰা সহযোগিতা বিচাৰি আব্দুল্লাই নৱনিৰ্বাচিত বিধানসভা জম্মু-কাশ্মীৰক পূৰ্ণ ৰাজ্য প্ৰদানৰ প্ৰস্তাৱ গৃহীত কৰাৰ বিষয়ে প্ৰধানমন্ত্ৰী মোদীক অৱগত কৰে।
তথ্য অনুসৰি, ওমৰে যোৱা সপ্তাহত তেওঁৰ মন্ত্ৰীসভাই গৃহীত কৰা এটা প্ৰস্তাৱো দাখিল কৰিছিল, য’ত কেন্দ্ৰক জম্মু-কাশ্মীৰৰ ৰাজ্যিক অৱস্থা “মূল ৰূপত” পুনৰ ঘূৰাই আনিবলৈ আহ্বান জনোৱা হৈছে।
শেহতীয়াকৈ, কেন্দ্ৰীয় শাসিত অঞ্চলৰ বিধানসভা নিৰ্বাচনত আব্দুল্লাৰ দল নেচনেল কনফাৰেন্সে ৯০খন বিধানসভাৰ আসনৰ ভিতৰত ৪২খন আসন লাভ কৰি চৰকাৰ গঠন কৰিছিল। নিৰ্বাচনত কংগ্ৰেছৰ সৈতে দলটোৰ মিত্ৰতা আছিল।
নতুন চৰকাৰে প্ৰথমখন কেবিনেট বৈঠকত এক প্ৰস্তাৱ গৃহীত কৰি জম্মু-কাশ্মীৰৰ ৰাজ্যিক অৱস্থা পুনৰ ঘূৰাই আনিবলৈ কেন্দ্ৰীয় চৰকাৰক আহ্বান জনায়। পৰৱৰ্তী সময়ত এই প্ৰস্তাৱত উপ-ৰাজ্যপাল মনোজ সিনহাই অনুমোদন জনায়। কেবিনেটৰ অনুমোদনৰ পিছত মুখ্যমন্ত্রীক প্রধানমন্ত্রী আৰু কেন্দ্রীয় চৰকাৰৰ সৈতে আলোচনা কৰি জম্মু-কাশ্মীৰৰ ৰাজ্যিক স্থান পুনৰ ঘূৰাই অনাৰ পোষকতা কৰাৰ কর্তৃত্ব দিয়া হৈছে৷
