হৰমুজ জলদ্বীপক লৈ আমেৰিকা আৰু ইৰাণৰ মাজত উত্তেজনা বৃদ্ধি পোৱাৰ মাজতে চীনেও নিজৰ টেণ্টেকেল সম্প্ৰসাৰণ কৰিছে। দক্ষিণ চীন সাগৰত নিৰৱে নিজৰ দখল শক্তিশালী কৰি তুলিছে চীনে। চীন আৰু ফিলিপাইনছৰ মাজত দীৰ্ঘদিন ধৰি বিবাদৰ কাৰণ হিচাপে পৰিগণিত হোৱা সামুদ্ৰিক অঞ্চল স্কাৰবাৰ শ্ব’লৰ ওপৰত চীনে আৰোপ কৰিছে নিষেধাজ্ঞা।
উপগ্ৰহৰ ছবিৰ পৰা দেখা গৈছে যে চীনে নাও, উপকূলৰ ৰক্ষী জাহাজ আৰু এক বৃহৎ ভাসমান বাধা ব্যৱহাৰ কৰি প্ৰৱেশ বিন্দুটো কাৰ্যতঃ বন্ধ কৰাৰ চেষ্টা কৰিছে। স্কাৰবাৰ শ্ব’লক এক চহকী মাছ ধৰা ঠাই বুলি গণ্য কৰা হয়। ফিলিপাইনছৰ মাছমৰীয়াসকলে দীৰ্ঘদিন ধৰি এই অঞ্চলটো ভ্ৰমণ কৰি আহিছে যদিও চীনে সমগ্ৰ অঞ্চলটোক নিজৰ বুলি দাবী কৰিছে। বাস্তৱত এই অঞ্চলটো ফিলিপাইনছৰ একচেটিয়া অৰ্থনৈতিক মণ্ডলৰ ভিতৰত পৰে।
শেহতীয়াকৈ চীনে প্ৰায় ৩৫০ মিটাৰ দীঘল ভাসমান বাধা স্থাপন কৰি এই অঞ্চলত প্ৰৱেশ বন্ধ কৰাৰ চেষ্টা চলাইছে। তাত চীনৰ কেইবাখনো মাছ ধৰা নাও আৰু উপকূলৰক্ষী জাহাজ মোতায়েন কৰা হৈছিল। ফিলিপাইনছৰ অভিযোগ যে, চীনে সামুদ্ৰিক মিলিচীয়াৰ জৰিয়তে অঞ্চলটোত অহৰহ হেঁচা প্ৰয়োগ কৰি তেওঁলোকৰ মাছমৰীয়াসকলক খেদি পঠিয়াইছে।
এক প্ৰতিবেদন অনুসৰি, ফিলিপাইনছেও ইয়াৰ প্ৰতিক্ৰিয়া প্ৰকাশ কৰি নিজৰ ক’ষ্ট গাৰ্ড আৰু নৌসেনাৰ জাহাজ প্ৰেৰণ কৰিছে, যাৰ ফলত সংঘাতৰ আশংকা আৰু অধিক বৃদ্ধি পাইছে। ফিলিপাইনছে ইয়াৰ পূৰ্বেও এনে বাধা আঁতৰাই পেলাইছে যদিও এইবাৰ চীনৰ উপস্থিতি অধিক আক্ৰমণাত্মক যেন দেখা গৈছে। এই উত্তেজনা কেৱল দুখন দেশতে সীমাবদ্ধ নহয়। এই ক্ষেত্ৰত আমেৰিকাও ফিলিপাইনছৰ সৈতে থিয় দিছে।
বিশেষজ্ঞসকলৰ মতে চীনে বৰ্তমানৰ পৰিস্থিতিৰ সুযোগ লৈছে, কিয়নো বৰ্তমান আমেৰিকাই ইৰাণ আৰু হৰমুজ জলদ্বীপৰ ওপৰত গুৰুত্ব আৰোপ কৰিছে। দক্ষিণ চীন সাগৰত চীনে নিজৰ স্থিতি আৰু অধিক শক্তিশালী কৰাৰ চেষ্টা চলাইছে। ২০১২ চনৰ পৰা চীনে স্কাৰবাৰ শ্ব’ল নিয়ন্ত্ৰণ কৰি আহিছে।২০১৬ চনত আন্তঃৰাষ্ট্ৰীয় ন্যায়ালয়ে ফিলিপাইনছৰ সপক্ষে ৰায় দিছিল যদিও চীনে ইয়াক মানি ল’বলৈ অস্বীকাৰ কৰিছিল। তেতিয়াৰ পৰাই এই অঞ্চলটো অহৰহ উত্তেজনাৰ কেন্দ্ৰবিন্দু হৈ আহিছে।
