চীনৰ এখন আদালতে প্ৰদান কৰিছে এক ঐতিহাসিক ৰায়। খবৰ অনুসৰি গুৰুতৰ অপৰাধত লিপ্ত এটা পৰিয়ালৰ ১১ জন সদস্যক মৃত্যুদণ্ডৰ শাস্তি প্ৰদান কৰিছে আদালতে। এই খবৰ এতিয়া বিশ্বজুৰি চৰ্চাৰ বিষয় হৈ পৰিছে।
পৰিয়ালটোৱে হত্যাৰ পৰা আৰম্ভ কৰি জালিয়াতি, বেশ্যাবৃত্তি আৰু ধন সৰবৰাহ আদি কেইবাটাও গুৰুতৰ অপৰাধত জড়িত আছিল। গোটেই পৰিয়ালটোৱে একেলগে এই কামবোৰ সম্পন্ন কৰিছিল।
আদালতৰ বিবৃতি অনুসৰি ৱেনঝৌ ইণ্টাৰমিডিয়েট পিপলছ ক’ৰ্টে ম্যানমাৰৰ কোকাঙস্থিত এটা প্ৰভাৱশালী পৰিয়ালৰ সদস্য মিং গুপিং, মিং জেনজেন আৰু ঝৌ ৱেইচাঙৰ লগতে আন ৮ জন লোকক মৃত্যুদণ্ডৰ শাস্তি প্ৰদান কৰে।
ইফালে আদালতে আন পাঁচজনৰ মৃত্যুদণ্ড স্থগিতাদেশ দিয়াৰ বিপৰীতে আন ১২জন অভিযুক্তক পাঁচৰ পৰা ২৪ বছৰলৈকে কাৰাদণ্ড বিহা হয়।
উল্লেখ্য যে, এই সমগ্ৰ পৰিয়ালটোক কুখ্যাত মিং পৰিয়াল বুলি জনা যায়। চীনৰ চৰকাৰী সম্প্ৰচাৰক চিচিটিভিৰ মতে, তদন্তত প্ৰকাশ পাইছে যে ২০১৫ চনৰ পৰা মিং পৰিয়ালে চীনৰ পূব প্ৰদেশ ঝেজিয়াঙত এটা সম্পূৰ্ণ অপৰাধ নেটৱৰ্ক চলাই আহিছে।
এই পৰিয়ালৰ সদস্য কেইজনে ম্যানমাৰৰ কোকাং অঞ্চলত নিজৰ প্ৰভাৱ ব্যৱহাৰ কৰি বিভিন্ন অঞ্চলত অসংখ্য অবৈধ ঘাটি স্থাপন কৰিছে, য’ৰ পৰাই তেওঁলোকে নিজৰ অপৰাধমূলক কাৰ্যকলাপ চলাই আহিছিল।
