বিগত এসপ্তাহৰ পৰা চীনৰ ৰাজধানী বেইজিঙত হোৱা প্ৰচণ্ড বৰষুণৰ ফলত এতিয়ালৈকে ৪৪ জন লোকৰ মৃত্যু হোৱাৰ লগতে ৯ জন লোক নিৰুদ্দেশ হৈ আছে। স্থানীয় বিষয়াসকলে বৃহস্পতিবাৰে এই সন্দৰ্ভত তথ্য প্ৰদান কৰে।
বেইজিঙত চৰকাৰ-প্ৰশাসনে বিগত চাৰিদিন ধৰি সাহায্য আৰু উদ্ধাৰ অভিযান অব্যাহত ৰখাৰ বিপৰীতে অঞ্চলটোত পুনৰ ধাৰাসাৰ বৰষুণ হোৱাৰ ফলত পথসমূহ যথেষ্ট ক্ষতিগ্ৰস্ত হৈছে। বিদ্যুৎ যোগান ব্যাহত হৈ পৰাৰ লগতে সাধাৰণ লোকসকলক নিৰাপদ স্থানলৈ স্থানান্তৰিত কৰা হৈছে।
স্থানীয় বিষয়াৰ উদ্ধৃতিৰে চৰকাৰী সংবাদ মাধ্যমে প্ৰকাশ কৰিছে যে নেৰানেপেৰা বৰষুণৰ ফলত হোৱা বানৰ ঘটনাত ৪৪ জন লোকৰ মৃত্যু হৈছে আৰু আন ৯ জন নিৰুদ্দেশ হৈছে। স্থানীয় বিষয়াসকলৰ মতে, বেইজিঙৰ উত্তৰ পাহাৰীয়া জিলা মিয়ুন আৰু ইয়াংকিঙৰ পৰা ধুমুহা বৰষুণ আৰু বানপানীৰ ফলত লোকৰ মৃত্যু হোৱাৰ খবৰ আহিছে।
উল্লেখ্য যে, শনিবাৰৰ পৰা আৰম্ভ হৈছে ধাৰাসাৰ বৰষুণ। ইয়াৰ পূৰ্বে সোমবাৰে ৰাষ্ট্ৰপতি ছি জিনপিঙে বানপানী আৰু ভূতাত্ত্বিক দুৰ্যোগৰ সৈতে মোকাবিলা কৰাৰ লগতে মানুহৰ জীৱন আৰু সম্পত্তিৰ সুৰক্ষা নিশ্চিত কৰাৰ বাবে সকলো প্ৰচেষ্টা চলাবলৈ নিৰ্দেশ দিছিল।
