জম্মু-কাশ্মীৰৰ কিস্তৱাৰ জিলাৰ চাশ্বটি গাঁৱত সংঘটিত হৈছে ভয়ংকৰ ডাৱৰ বিস্ফোৰণ। আজি দুপৰীয়া ভাগত হোৱা এই ডাৱৰ বিস্ফোৰণ ফলত অঞ্চলটোত প্ৰৱল বানৰ সৃষ্টি হয় আৰু এই ঘটনাত ১২ জন লোকৰ মৃত্যু হয়।
ডাৱৰ বিস্ফোৰণৰ ঘটনাৰ পিছতে অঞ্চলটোত উদ্ধাৰকাৰী দল উপস্থিত হৈ ক্ষীপ্ৰতাৰে উদ্ধাৰ অভিযানত ব্ৰতী হয়। ইতিমধ্যে ঘটনাস্থলৰ পৰা বহু কেইগৰাকী ভক্তক নিৰাপদে উদ্ধাৰ কৰিছে উদ্ধাৰকাৰী দলে।
জিলাখনৰ শীৰ্ষ বিষয়াই জানিব দিয়া অনুসৰি উদ্ধাৰকাৰী দলে এই পৰ্যন্ত ১২ জন লোকৰ মৃতদেহ উদ্ধাৰ কৰিছে। মৃতকৰ সংখ্যা আৰু অধিক বৃদ্ধি পাব পাৰে বুলিও আশংকা কৰিছে প্ৰশাসনে।
জ্যেষ্ঠ আৰক্ষী অধীক্ষক নৰেশ সিঙৰ সৈতে ডাৱৰ বিস্ফোৰণ হোৱা অঞ্চলত উপস্থিত হোৱা কিস্তৱাৰৰ উপায়ুক্ত পংকজ শৰ্মাই কয়, ‘মাছাইল মাতা যাত্ৰাৰ আৰম্ভণিৰ স্থান কিস্তৱাৰৰ চাশ্বটি অঞ্চলত বান পৰিস্থিতিৰ উদ্ভৱ হৈছে। উদ্ধাৰ অভিযান আৰম্ভ কৰা হৈছে।’
ইতিমধ্যে এন ডি আৰ এফে উধামপুৰ ঘাটিৰ পৰা ডাৱৰ বিস্ফোৰণৰ ক্ষতিগ্ৰস্ত অঞ্চললৈ আধুনিক গেজেটেৰে সজ্জিত ১৮০ জন সদস্যক প্ৰেৰণ কৰা হৈছে।
ইফালে ঘটনা সন্দৰ্ভত জানিব পৰাৰ পিছতে কেন্দ্ৰীয় মন্ত্ৰী তথা জম্মু-কাশ্মীৰৰ উধামপুৰ সমষ্টিৰ সাংসদ জীতেন্দ্ৰ সিঙে স্থানীয় প্ৰশাসনৰ সৈতে ফোনযোগে বাৰ্তালাপ কৰি পৰিস্থিতিৰ বুজ লয়।
জম্মু-কাশ্মীৰৰ মুখ্যমন্ত্ৰী ওমৰ আব্দুল্লাহৰ লগতে ৰাজ্যপাল মনোজ সিনহাইও এই ডাৰ বিস্ফোৰণৰ ঘটনাত উদ্বেগ প্ৰকাশ কৰি মৃত্যু হোৱা লোকসকলৰ চিৰশান্তি কামনা কৰি শোকসন্তপ্ত পৰিয়াললৈ সমবেদনা জ্ঞাপন কৰে।
