দুদিনীয়া ভ্ৰমণসূচীৰে ২৪ ফেব্ৰুৱাৰীত অসমলৈ আহিব প্ৰধানমন্ত্ৰী নৰেন্দ্ৰ মোদী। সৰুসজাইৰ ঝুমইৰ নৃত্য অনুষ্ঠানত উপস্থিত থাকিব প্ৰধানমন্ত্ৰী মোদী। ২৫ ফেব্ৰুৱাৰীত এডভাণ্টেজ আছাম ২.০ উপস্থিত থাকিব প্ৰধানমন্ত্ৰীগৰাকী। এডভাণ্টেজ আছাম ২.০ৰ সামৰণী অনুষ্ঠানত উপস্থিত থাকিব বিত্তমন্ত্ৰী নিৰ্মলা সীতাৰমণ। অনুষ্ঠানত ক্ষুদ্ৰ উদ্যোগ, লাখপতি বাইদেউসকল উপস্থিত থাকিব। ৩১ খন দেশৰ ৰাষ্ট্ৰদূত আৰু দেশৰ প্ৰতিনিধিয়ে অংশ ল’ব এডভাণ্টেজ আছামত। এই সকলো তথ্য প্ৰকাশ কৰিছে অসমৰ মুখ্যমন্ত্ৰী হিমন্ত বিশ্ব শৰ্মাই।
এডভাণ্টেজ আছাম ঝুমইৰ নৃত্য আদি প্ৰসংগক লৈ আজি সম্বোধন কৰা এখন সংবাদমেলত মুখ্যমন্ত্ৰী শৰ্মাই কয় যে এডভাণ্টেজ আছাম ১.০ ৰ প্ৰথম সফলতা আছিল নুমলীগড় শোধনাগাৰৰ ক্ষমতা বৃদ্ধি। দ্বিতীয়তে পাৰাদ্বীপৰ পৰা নুমলীগড়লৈ ক্ৰুড অইল পাইপ স্থাপন। তৃতীয়তে গেছ পাইপ লাইন স্থাপন।
বিগত তিনি বছৰত অসমত যথেষ্ট শান্তি ঘূৰি অহা বুলি উল্লেখ কৰি মুখ্যমন্ত্ৰীয়ে কয়, ‘জাপানে অসমৰ পৰা বহু মেন পাৱাৰ ল’ব বিচাৰে। ছিংগাপুৰে অসমৰ পৰা নাৰ্ছ ল’ব বিচাৰিছে। ইতিমধ্যে ১৭ গৰাকীয়ে তাত কাম কৰি আছে। ক্ষুদ্ৰ উদ্যোগক বাদ দি কেতিয়াও মজলীয়া আৰু বৃহত উদ্যোগ সফল হ’ব নোৱাৰে। জাপানে অসমৰ সৈতে দুখন চুক্তি কৰিব বিচাৰিছে। ইয়াৰে এখন চুক্তি হ’ব তেওঁলোকৰ প্ৰবক্তাই অসমৰ যুৱক-যুৱতীক প্ৰশিক্ষণ দিব। ৯ মাহৰ বিশেষ প্ৰশিক্ষণ শিবিৰ, তেওঁলোকক আমি প্ৰশিক্ষণৰ স্থান দিব লাগিব। প্ৰশিক্ষণ লোৱা প্ৰতিজনে কমেও ৫০ হাজাৰ টকা দৰমহা লাভ কৰিব। অৱশ্যে প্ৰশিক্ষণ লৈ যদি কোনোবাই জাপান যাব নিবিচাৰে তেন্তে ভাৰতত থকা জাপানৰ প্ৰতিষ্ঠানতে কাম লাভ কৰিব।’
ইয়াৰ উপৰি অসমখন মুখ্যমন্ত্ৰীয়ে সলনি কৰিব নোৱাৰে, ৰাজ্যৰ প্ৰতিজন মানুহে সলনি কৰিব লাগিব বুলিও মন্তব্য কৰে মুখ্যমন্ত্ৰীয়ে।
