বিহাৰত শিক্ষক নিযুক্তি পৰীক্ষাৰ বাবে প্ৰস্তুতি চলাই থকা যুৱক-যুৱতীসকলৰ বাবে সুখবৰ। চলিত বৰ্ষত অনুষ্ঠিত হ’বলগীয়া নিৰ্বাচনৰ পূৰ্বে অৰ্থাত মঙলবাৰে আন এক বৃহৎ ঘোষণা কৰিছে মুখ্যমন্ত্ৰী নীতিশ কুমাৰে।
ৰাজ্যৰ বিদ্যালয়সমূহত খালী হৈ থকা শিক্ষকৰ পদসমূহ শীঘ্ৰে পূৰণ কৰিবলৈ মুখ্যমন্ত্ৰী নীতিশ কুমাৰে নিৰ্দেশ জাৰি কৰিছে। BPSC TRE-4 পৰীক্ষা সন্দৰ্ভত লোৱা এই সিদ্ধান্ত তেওঁ ছ’চিয়েল মিডিয়াৰ জৰিয়তে ৰাজহুৱা কৰে।
অতি শীঘ্ৰে নিযুক্তি প্ৰক্ৰিয়া সম্পন্ন কৰাৰ উদ্দেশ্যে ৰাজ্যৰ চৰকাৰী বিদ্যালয়সমূহত কিমান শিক্ষকৰ পদ খালী হৈ আছে তাৰ হিচাপ অতি শীঘ্ৰে কৰিব বুলিও জানিবলৈ দিয়ে।
মুখ্যমন্ত্ৰীগৰাকীয়ে কয় যে যোগ্য পৰীক্ষাৰ্থীসকলে যাতে সময়মতে সুযোগ লাভ কৰে তাৰ বাবে শীঘ্ৰে BPSCৰ জৰিয়তে TRE-4 পৰীক্ষা অনুষ্ঠিত কৰা হ’ব।
ইতিমধ্যে ৰাজ্য চৰকাৰে স্পষ্ট কৰি দিছে যে নিযুক্তিত মহিলাৰ বাবে ৩৫ শতাংশ সংৰক্ষণৰ সুবিধা কেৱল বিহাৰৰ মহিলা বাসিন্দাকহে দিয়া হ’ব।
