কৰ্ণাটকৰ বেলাগাভিত বৃহস্পতিবাৰে অনুষ্ঠিত হয় কংগ্ৰেছৰ কাৰ্যকৰী কমিটিৰ গুৰুত্বপূৰ্ণ বৈঠক। এই বৈঠকত গ্ৰহণ কৰা হয় দুটা প্ৰস্তাৱ। প্ৰথমটো মহাত্মা গান্ধীৰ ওপৰত আৰু দ্বিতীয়তো ৰাজনৈতিক প্ৰস্তাৱ। এই কথা জনায় কংগ্ৰেছৰ সাধাৰণ সম্পাদক কে চি বেনুগোপালে।
২০২৫ চনত কংগ্ৰেছে সাংগঠনিক সংস্কাৰ কাৰ্যসূচী আৰম্ভ কৰিব বুলি তেওঁ কয়। ইয়াৰ অধীনত প্ৰতিটো স্তৰৰ নেতাসকলৰ পৰামৰ্শসমূহ পুংখানুপুংখভাৱে পৰীক্ষা কৰা হ’ব। ইয়াৰ উপৰি ২০২৫ চনৰ ২৬ জানুৱাৰীৰ পৰা আৰম্ভ হ’ব এবছৰীয়া ‘সংবিধান বচাও ৰাষ্ট্ৰীয় পদ যাত্ৰা’।
ইফালে কংগ্ৰেছ নেতা জয়ৰাম ৰমেশে কয় যে আমি বিশ্বাস কৰো যে ভাৰত জোড়ো যাত্ৰাই কংগ্ৰেছক নতুন জীৱন দিছে আৰু ই কংগ্ৰেছৰ ৰাজনীতিত এক টাৰ্নিং পইণ্ট আছিল। ইয়াৰ পিছত ভাৰত জোড়ো ন্যায় যাত্ৰা অনুষ্ঠিত হয় আৰু এতিয়া ২০২৫ চনৰ ২৬ জানুৱাৰীত আমি এবছৰীয়া ‘সংবিধান বচাওক ৰাষ্ট্ৰীয় পদ যাত্ৰা’ আৰম্ভ কৰিম।
জয়ৰাম ৰমেশে লগতে কয়, কাইলৈ আমি বেলাগাভিত ‘জয় বাপু, জয় ভীম আৰু জয় সংবিধান’ ৰেলীৰ আয়োজন কৰিম। তাৰ পিছত আমি ইয়াক আৰু আগুৱাই লৈ যাম। ইয়াৰ পিছত আমি এবছৰৰ বাবে ‘সংবিধান বচাও ৰাষ্ট্ৰীয় পদ যাত্ৰা’ উলিয়াম। ইয়াৰ অধীনত প্ৰতিখন ৰাজ্যতে গাঁৱৰ পৰা চহৰলৈ পদযাত্ৰা উলিওৱা হ’ব। ইয়াত সকলো ডাঙৰ নেতাই অংশগ্ৰহণ কৰিব। ইয়াত সংবিধান, অৰ্থনৈতিক ব্যৱস্থা, গণতন্ত্ৰ, নিৰ্বাচন আয়োগ, আদানীকে ধৰি সকলো বিষয় উত্থাপন কৰা হ’ব।
ইফালে ইণ্ডি মিত্ৰজোঁট সন্দৰ্ভত আম আদমি পাৰ্টিৰ শেহতীয়া স্থিতি সন্দৰ্ভত সোধা প্ৰশ্নৰ উত্তৰত কে চি বেনুগোপালে কয় যে ইণ্ডি মিত্ৰতাক লৈ আমি চিন্তিত। আমি ইণ্ডি মিত্ৰজোঁটৰ সমৰ্থক।
দৰাচলতে আম আদমি পাৰ্টীয়ে কংগ্ৰেছক হুমকি প্ৰদান কৰিছে যে যদিহে দলটোৱে সাংসদ অজয় মাকেনৰ বিৰুদ্ধে ব্যৱস্থা গ্ৰহণ নকৰে, তেন্তে ইণ্ডি মিত্ৰজোঁটত অন্তৰ্ভুক্ত বাকী দলসমূহক কংগ্ৰেছক মিত্ৰজোঁটৰ পৰা বাহিৰ কৰিবলৈ দাবী জনাব।
ইয়াৰ পূৰ্বে কংগ্ৰেছ কাৰ্য্যকৰী সমিতিৰ বৈঠকত ভাষণ দি লোকসভাৰ নেতা তথা কংগ্ৰেছ সাংসদ ৰাহুল গান্ধীয়ে মহাৰাষ্ট্ৰ বিধানসভা নিৰ্বাচনৰ ফলাফলক লৈ প্ৰশ্ন উত্থাপন কৰি নিৰ্বাচন আয়োগৰ ভূমিকাক সন্দেহজনক বুলি অভিহিত কৰে।
তেওঁ কয়, ‘ভোটাৰ তালিকাত বৃহৎ পৰিৱৰ্তন কৰা হ’ল। ২০২৪ চনৰ লোকসভা নিৰ্বাচনৰ পিছত মহাৰাষ্ট্ৰৰ ১১৮খন আসনত ৭২ লাখ ভোটাৰ সংযোজন হয়, ইয়াৰে ১০২খন আসনত বিজেপিয়ে জয়লাভ কৰে। ক’ৰবাত যে কিবা ভুল হৈছে সেয়া স্পষ্ট।’
