ৰাজ্যত পুনৰ সংঘটিত হৈছে এনকাউন্টাৰৰ ঘটনা। এইবাৰল গোলকগঞ্জ আৰক্ষী থানাৰ অন্তৰ্গত গাইখোৱাত গো-মাফিয়াক কেন্দ্ৰ কৰি আৰক্ষীয়ে গুলীচালনা কৰে। গুলীচালনাত গুৰুতৰভাবে আঘাতপ্ৰাপ্ত হয় গো-মাফিয়া ছিৰাজুল হক।
গুৰুতৰভাৱে আঘাতপ্ৰাপ্ত ছিৰাজুল হক বৰ্তমান ধুবুৰী চিকিৎসা মহাবিদ্যালয়ত চিকিৎসাধীন হৈ আছে।
জানিব পৰা অনুসৰি, আজি পুৱতি নিশা ছিৰাজুল হকক লগত লৈ গাইখোৱাত চোৰাং গৰুৰ বিৰুদ্ধে অভিযান চলাইছিল আৰক্ষীৰ এটা দলে। সেই সময়তে আৰক্ষীক আক্ৰমণ কৰি পলায়নৰ চেষ্টা চলাইছিল গো-মাফিয়া ছিৰাজুলে। লগে লগে গোলকগঞ্জ আৰক্ষীয়ে কৰায়ত্ত কৰিবলৈ চলোৱা গুলীচালনাত আহত হয় ছিৰাজুল।
উল্লেখ্য যে, বিগত ৩০ ঘন্টাত ৰাজ্যত ৬ টাকৈ এনকাউন্টাৰৰ ঘটনা সংঘটিত হৈছে। বুধবাৰে নিশা গোৱালপাৰাত সংঘটিত হৈছে এনকাউন্টাৰৰ ঘটনা। আৰক্ষীৰ গুলীত আহত হয় দুজনকৈ দুৰ্ধৰ্ষ ডকাইত। গুলীবিদ্ধ ডকাইত দুটাৰ নাম আছান আলী আৰু জাহিদুল ইছলাম। আগিয়া থানাৰ পৰা তদন্তৰ বাবে লৈ অহাৰ সময়তে আৰক্ষীৰ জিম্মাৰ পৰা পলাবলৈ চেষ্টা কৰাত দুয়োজনকে আৰক্ষীয়ে গুলীচালনা কৰে।
জানিব পৰা মতে, দুয়োজন ডকাইত ব্যৱসায়ী অশোক গোৱেলৰ হত্যাকাণ্ডৰ লগত জড়িত আছিল। আছান আলী আছিল অশোক গোৱেলৰ বাহন চালক আৰু জাহিদুল ইছলাম আছিল ডকাইতৰ দলটোৰ বাহন চালক।
ইফালে, বুধবাৰে কাছাৰ জিলাতো সংঘটিত হৈছে এনকাউন্টাৰৰ ঘটনা। কাছাৰ আৰক্ষীৰ গুলীত নিহত হৈছিল উগ্ৰপন্থীৰ তিনি সদস্য। মঙলবাৰে গ্ৰেপ্তাৰ কৰা তিনি উগ্ৰপন্থী সদস্যক লৈ নিশা অভিযান চলাইছিল আৰক্ষীয়ে। সেই অভিযানৰ সময়তে দুয়ো পক্ষৰ মাজত সংঘৰ্ষ হয়। আৰক্ষীৰ গুলীত নিহত হয় তিনি উগ্ৰপন্থী সদস্য। নিহত উগ্ৰপন্থী দুজনৰ ঘৰ কাছাৰত আৰু আনজনৰ ঘৰ মণিপুৰত।
