চলিত আই পি এল ছীজনত আশানুৰূপ প্ৰদৰ্শন কৰাত ব্যৰ্থ হোৱা কলকাতা নাইট ৰাইডাৰ্ছ শিৱিৰত যোগ দিছে টেনিছ বল ক্ৰিকেটৰ চিৰ পৰিচিত এজন অলৰাউণ্ডাৰে। তাৰকা অলৰাউণ্ডাৰগৰাকীয়ে কে কে আৰ শিৱিৰত নেট বলাৰ হিচাপে যোগ দিছে।
টেনিছ বল ক্ৰিকেটক আগবঢ়াই নিয়াৰ উদ্দেশ্যে আৰম্ভ হোৱা ইণ্ডিয়ান ষ্ট্ৰীট প্ৰিমিয়াৰ লীগ চমুকৈ আই এছ পি এলৰ বিগত দুটা ছীজনত চমকপ্ৰদ প্ৰদৰ্শন আগবঢ়োৱা অভিষেক কুমাৰ দলহৰ ওৰফে কৰণ আম্বালাক চলিত বৰ্ষৰ বাবে কলকাতা নাইট ৰাইডাৰ্ছে নেট বলাৰ হিচাপে অন্তৰ্ভুক্ত কৰিছে।
আই এছ পি এল ইতিহাসৰ সবাটোকৈ দামী ক্ৰিকেটাৰ অভিষেক দলহৰে লীগত সৰ্বশ্ৰেষ্ঠ প্ৰদৰ্শন কৰা খেলুৱৈসকলৰ ভিতৰত অন্যতম। বলিং, বেটিং, ফিল্ডিঙত দেখুওৱা দক্ষতাৰ বাবে তেওঁ ক্ৰিকেট অনুৰাগীৰ দৃষ্টি কাঢ়িবলৈ সক্ষম হৈছে।
চলিত বছৰৰ আৰম্ভণিতে হোৱা আই এছ পি এলৰ দ্বিতীয় ছীজনত অমিতাভ বচ্চন মালিকানাধীন মাঝী মুম্বাই চেম্পিয়ন হোৱা বিশেষ ভূমিকা গ্ৰহণ কৰিছিল দলহৰে। তেওঁ প্ৰতিযোগিতাখনত শ্ৰেষ্ঠ বলাৰৰ খিতাপ দখল কৰিছিল। আনহাতে প্ৰথম ছীজনত তেওঁ লাভ কৰিছিল শ্ৰেষ্ঠ ক্ৰিকেটাৰৰ সন্মান।
আম্বালাত জন্মগ্ৰহণ কৰা অভিষেকে আই এছ পি এলৰ দুটা ছীজনত ১৯ খন মেচত ৩২৪ ৰান সংগ্ৰহ কৰাৰ লগতে ৩৩টা উইকেট দখল কৰিছে।
উল্লেখ্য যে, গ্ৰাম্যাঞ্চলৰ পৰা আই এছ পি এলৰ দৰে ডাঙৰ মঞ্চৰ জৰিয়তে আই পি এল চিষ্টেমত প্ৰৱেশ কৰাটো ভাৰতৰ কোটি কোটি টেনিছ বল ক্ৰিকেটাৰৰ বাবে উৎসাহজনক আশাৰ খবৰ বুলি গণ্য কৰা হৈছে।
