বহু প্ৰতিক্ষীত দিল্লী বিধানসভা নিৰ্বাচনৰ দিন ঘোষণা কৰা হ’ল। নতুন দিল্লীৰ বিজ্ঞান ভৱনত আয়োজিত সংবাদমেলত মুখ্য নিৰ্বাচন আয়ুক্ত ৰাজীৱ কুমাৰে নিৰ্বাচনৰ দিন ঘোষণা কৰে। ৭০খন আসনযুক্ত দিল্লী বিধানসভাৰ নিৰ্বাচনৰ ভোটগ্ৰহণ অহা ৫ ফেব্ৰুৱাৰীত অনুষ্ঠিত হ’ব।
এটা পৰ্যায়তে অনুষ্ঠিত হ’বলগীয়া নিৰ্বাচনৰ ভোটগণনা হ’ব ৮ ফেব্ৰুৱাৰীত।
নিৰ্বাচনৰ দিন ঘোষণা কৰাৰ লগে লগে প্ৰযোজ্য হ’ল নিৰ্বাচন আচৰণ বিধি। এইবাৰ ১৩ হাজাৰ ৩৩টা ভোটকেন্দ্ৰত অনুষ্ঠিত হ’ব নিৰ্বাচন। মুঠ ভোটাৰৰ সংখ্যা ১ কোটি ৫৫ লাখ। ইয়াৰে ৮৩ লাখৰো অধিক ভোটাৰ হৈছে পুৰুষ। এই কথা জনাই মুখ্য নিৰ্বাচন আয়ুক্ত ৰাজীৱ কুমাৰে।
অহা ২৩ ফেব্ৰুৱাৰীত অন্ত পৰিব দিল্লী বিধানসভাৰ কাৰ্যকাল।
উল্লেখ্য যে দিল্লী বিধানসভা নিৰ্বাচনক লৈ শাসক-বিৰোধীৰ মাজত বৃদ্ধি পাইছে তৎপৰতা। এইবাৰৰ নিৰ্বাচনত শাসকীয় দল আপক ক্ষমতাচ্যুত কৰাৰ লক্ষ্যৰে আগ্ৰাসী প্ৰচাৰ অভিযান আৰম্ভ কৰিছে বিজেপিয়ে। বিজেপিৰ জ্যেষ্ঠ নেতাৰ সমান্তৰালকৈ এইবাৰ প্ৰধানমন্ত্ৰী নৰেন্দ্ৰ মোদীয়েও লক্ষ্য কৰি লৈছে অৰবিন্দ কেজৰিৱাল নেতৃত্বাধীন আপক।
ইফালে নিৰ্বাচনৰ দিন ঘোষণাৰ পূৰ্বেই শাসনাধিষ্ঠ আপে আটাইকেইখন আসনৰ বাবে প্ৰাৰ্থীৰ নাম ঘোষণা কৰিছে। কংগ্ৰেছৰ লগতে বিজেপিয়েও এখন এখন প্ৰাৰ্থীৰ তালিকা প্ৰকাশ কৰা দেখা গৈছে।
স্মৰ্তব্য যে, ২০২০ বৰ্ষত অনুষ্ঠিত হোৱা বিধানসভা নিৰ্বাচনত আপে ৬২ খন আসনত জয়লাভ কৰাৰ বিপৰীতে বিজেপিয়ে ৮খন আসনত জয়ী হৈছিল।
