১৭ মে’ৰ পৰা পুনৰ নিয়মীয়াকৈ চলিব চলিত ছিজনৰ আই পি এলৰ বাকী থকা মেচসমূহ। প্ৰায় অন্তিম পৰ্যায়ত থকা এই প্ৰতিযোগিতাখন পুনৰ আৰম্ভ হোৱাৰ পূৰ্বে দিল্লী কেপিটেলছ দলৰ অনুৰাগীৰ বাবে আহিছে এটা বেয়া খবৰ।
দলটোৰ ষ্টাৰ বেটাৰ তথা অপেনাৰ জেক ফ্ৰেজৰ-মেকগৰ্ক প্ৰতিযোগিতাখনৰ বাকী থকা মেচসমূহৰ পৰা বাহিৰ হৈছে। চলিত ছিজনত মেকগৰ্কে দিল্লীৰ হৈ ৬ খন মেচ খেলি মাত্ৰ ৫৬ ৰান কৰিবলৈ সক্ষম হৈছে। এই সময়ত তেওঁৰ সৰ্বাধিক ব্যক্তিগত স্ক’ৰ আছিল ৩৮ ৰান।
মেকগৰ্কৰ ঠাইত বাংলাদেশৰ ষ্টাৰ বলাৰ মুস্তাফিজুৰ ৰহমানক চুক্তিবদ্ধ কৰা বুলি বুধবাৰে দিল্লী কেপিটেলছৰ তৰফৰ পৰা জানিব দিয়ে।
উল্লেখ্য যে, আই পি এল ২০২৫ বৰ্ষৰ পূৰ্বে অনুষ্ঠিত হোৱা মেগা নিলামত কোনো এজন বাংলাদেশী ক্ৰিকেটাৰেই কোনো এটা দলত চুক্তিবদ্ধ হোৱা নাছিল।
প্ৰথমবাৰৰ বাবে ২০১৬ চনত আই পি এলত অভিষেক ঘটিছিল মুস্তাফিজুৰ ৰহমানৰ। তেওঁ প্ৰথমবাৰ ছানৰাইজাৰ্ছ হায়দৰাবাদৰ হৈ খেলিছিল। ছানৰাইজাৰ্ছৰ উপৰি মুস্তাফিজুৰে মুম্বাই ইণ্ডিয়ানছ, চেন্নাই ছুপাৰ কিংছ আৰু দিল্লী কেপিটেলছকো প্ৰতিনিধিত্ব কৰিছে।
স্মৰ্তব্য যে, ভাৰত-পাকিস্তানৰ মাজত চলা আক্ৰমণ-প্ৰত্যাক্ৰমণৰ বাবে কিছুদিনলৈ আই পি এল স্থগিত ৰখাৰ সিদ্ধান্ত লৈছিল বি চি চি আইয়ে। শেহতীয়াকৈ দুয়োখন দেশৰ মাজত হোৱা যুদ্ধবিৰতিৰ বাবে পুনৰ শান্তি ঘূৰি অহাত পুনৰ ১৭ মে’ৰ পৰা আই পি এলৰ বাকী থকা মেচসমূহ অনুষ্ঠিত কৰাৰ সিদ্ধান্ত গ্ৰহণ কৰিছে।
