অন্ত পৰিল দিল্লী বিধানসভা নিৰ্বাচনৰ ভোটগ্ৰহণ। এতিয়া দিল্লীৰ লগতে ৰাজনীতিৰ জ্ঞান ৰখা লোকসকলে অধীৰ আগ্ৰহেৰে বাট চাইছে ৮ ফেব্ৰুৱাৰীলৈ। ৮ ফেব্ৰুৱাৰীত নিৰ্বাচন আয়োগে ঘোষণা কৰিব বিধানসভা নিৰ্বাচনৰ ফলাফলা। ফলাফল ঘোষণাৰ পূৰ্বে আজি প্ৰকাশ পালে EXIT POLL।
চূড়ান্ত ফলাফলৰ পূৰ্বে আজি কিছু সময় পূৰ্বে বিভিন্ন টেলিভিছন চেনেল আৰু সংস্থাই প্ৰকাশ কৰিছে এগজিট প’লৰ ফলাফল।
এগজিট প’ল হ’ল এনে এক ব্যৱস্থা, যাৰ জৰিয়তে নিৰ্বাচনৰ পূৰ্বে ফলাফলৰ এক অনুমান কৰা হয়। ভোটদানৰ পূৰ্বে ভোটাৰসকলৰ মাজত কৰা সমীক্ষাৰ ভিত্তিতে বিভিন্ন সংস্থাই ফলাফলৰ অনুমান কৰে।
ইয়াৰ জৰিয়তে সামগ্ৰিকভাৱে কোন দল বা কোন মিত্ৰজোঁট আগত থাকিব বা কোন পিছ পৰিব তাৰ এক পূৰ্বানুমান কৰা হয়।
Matrizeৰ সমীক্ষা অনুসৰি দিল্লীত এইবাৰ বিজেপিৰ চৰকাৰ হোৱাৰ পূৰ্ণ সম্ভাৱনা আছে। দিল্লী নিৰ্বাচনত বিজেপিয়ে ৩৫ৰ পৰা ৪০ খন লাভ কৰাৰ সম্ভাৱনা। শাসনাধিষ্ঠ আপক দিছে ৩২ৰ পৰা ৩৫ খন আসন। ইফালে কংগ্ৰেছক দিছে মাত্ৰ এখন আসন।
পিপলছ ইনছাইটৰ সমীক্ষা অনুসৰি অৰিবন্দ কেজৰিৱালৰ আশাত চেচাপানী ঢালি এইবাৰ দিল্লীৰ চৰকাৰ গঠন কৰিব বিজেপিয়ে। সংস্থাটোৱে বিজেপিক দিছে ৪০ৰ পৰা ৪৪খন আসন। আনহাতে আপক দিয়া হৈছে ২৫ৰ পৰা ২৯ খন আসন।
ইফালে পিপলছ পালছৰ সমীক্ষা অনুসৰিও দিল্লীত বিজেপিৰ চৰকাৰ হোৱাৰ ইংগিত প্ৰদান কৰিছে। সংস্থাটোৰ সমীক্ষা অনুসৰি বিজেপিয়ে লাভ কৰিব ৫১ৰ পৰা ৬০ খন আসন। শাসনাধিষ্ঠ আপক দিছে মাত্ৰ ১০ৰ পৰা ১৯খন আসন।
আনহাতে চানক্য ষ্ট্ৰেটেজিৰ সমীক্ষা অনুসৰি দিল্লীত হ’ব বিজেপিৰ চৰকাৰ। তেওঁলোকৰ সমীক্ষা অনুসৰি বিজেপিয়ে লাভ কৰিব ৩৯ৰ পৰা ৪৪খন আসন আৰু আপে ২৫ৰ পৰা ২৮ খন আসন লাভ কৰিব।
