কা-বিৰোধী আন্দোলনৰ সময়ত উচটনিমূলক মন্তব্যৰ জৰিয়তে সাম্প্ৰদায়িক সংঘৰ্ষ কৰোৱাৰ অভিযোগত চলি থকা দেশদ্ৰোহৰ গোচৰত চাৰ্জিল ইমাম, উমৰ খালিদ, খালিদ ছাইফি, তাছলীম আহমেদকে ধৰি ৯ জন অভিযুক্তৰ জামিন আবেদন নাকচ কৰিছে দিল্লী উচ্চ ন্যায়ালয়ে।
এই সিদ্ধান্ত ন্যায়াধীশ নবীন চাওলা আৰু ন্যায়াধীশ শৈলেন্দ্ৰ কৌৰৰ বিচাৰপীঠে প্ৰদান কৰিছে।
ইয়াৰ পূৰ্বে আৰক্ষীয়ে যুক্তি প্ৰদান কৰিছিল যে ২০২০ চনৰ ফেব্ৰুৱাৰীত উত্তৰ-পূব দিল্লীত নাগৰিকত্ব সংশোধনী আইনৰ বিৰোধিতাৰে আয়োজন কৰা প্ৰতিবাদে সাম্প্ৰদায়িক সংঘৰ্ষৰ ৰূপ লোৱাৰ ঘটনাৰ মূল ষড়যন্ত্ৰকাৰী আছিল চাৰ্জিল ইমাম। ১০ জুলাইত এই সিদ্ধান্ত সংৰক্ষিত কৰিছিল আদালতে।
জামিন আবেদন নাকচ কৰি আদালতে স্বীকাৰ কৰে যে এই অভিযুক্তসকলৰ বিৰুদ্ধে উত্থাপিত অভিযোগ গুৰুতৰ। এই গোচৰত অভিযোগ উত্থাপন হৈছে যে অভিযুক্তই CAA আৰু NRCৰ বিৰুদ্ধে প্ৰতিবাদৰ জৰিয়তে সাম্প্ৰদায়িক সংঘৰ্ষ কৰোৱাৰ কৌশল ৰচনা কৰিছিল।
২০২০ চনৰ ফেব্ৰুৱাৰী মাহত সংঘটিত এই সাম্প্ৰদায়িক সংঘৰ্ষত ৫৩ জন লোকৰ মৃত্যু হোৱাৰ লগতে ৭০০ৰো অধিক লোক আহত হৈছিল।
দিল্লী আৰক্ষীৰ মতে, এক ষড়যন্ত্ৰৰ অংশ হিচাপে হোৱাটছএপ গ্ৰুপ, ভাষণ আৰু বৈঠকৰ জৰিয়তে উচটনিমূলক মন্তব্য আৰু কথা প্ৰচাৰ কৰা হৈছিল, যাতে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ভাৰত ভ্ৰমণৰ সময়ত আন্তঃৰাষ্ট্ৰীয় মঞ্চত দেশখনৰ ভাবমূৰ্তি কলংকিত হ’ব পাৰে।
