অৰবিন্দ কেজৰিৱাল নেতৃত্বাধীন আপ দলক ওফৰাই ২৭ বছৰৰ মূৰত শাসনত অধিষ্ঠিত হ’বলৈ আগবাঢ়িছে বিজেপি। বৃহৎ ৰাজনৈতিক পট পৰিৱৰ্তনৰ পিছতে দিল্লী চৰকাৰৰ শাধাৰণ প্ৰশাসন বিভাগে এক নিৰ্দেশনাৰ জৰিয়তে সচিবালয় ছীল কৰাৰ নিৰ্দেশ প্ৰদান কৰিছে।
সুৰক্ষাজনিত কাৰণ তথা সচিবালয়ৰ গুৰুত্বপূৰ্ণ নথি-পত্ৰ চুৰি হোৱাৰ আশংকাত এই সিদ্ধান্ত গ্ৰহণ কৰা হৈছে। সাধাৰণ প্ৰশাসন বিভাগৰ অনুমতি অবিহনে যিকোনো ধৰণৰ ফাইল, নথি-পত্ৰ, কম্পিউটাৰ হাৰ্ডৱেৰ আদি সচিবালয়ৰ পৰা যাতে নিব নোৱাৰে তাৰ বাবে এই নিৰ্দেশনা প্ৰদান কৰিছে।
জাননীখনত কোৱা হৈছে যে ফাইল, নথি-পত্ৰ, ইলেক্ট্ৰ’নিক ফাইল আদিৰ সুৰক্ষা নিশ্চিত কৰিবলৈ এই নিৰ্দশনা প্ৰদান কৰা হোৱা বুলি জনায়।
উল্লেখ্য যে, বিগত ৫ ফেব্ৰুৱাৰীত অনুষ্ঠিত হোৱা দিল্লী বিধানসভা নিৰ্বাচনৰ আজি ভোটগণনা চলি আছে। এতিয়ালৈকে অহা ফলাফলৰ পৰা এই কথা নিশ্চিত হৈছে যে দিল্লীত ২৭ বছৰৰ মূৰত বিজেপিয়ে শাসনত অধিষ্ঠিত হোৱাটো প্ৰায় নিশ্চিত হৈ পৰিছে।
নিৰ্বাচন আয়োগৰ তথ্য অনুসৰি, এই পৰ্যন্ত বিজেপিয়ে ২৩ খন আসনত জয়লাভ কৰাৰ বিপৰীতে ২৪ খন আসনত বৃহৎ অগ্ৰগতি লাভ কৰি আছে। আনহাতে শাসনাধিষ্ঠিত আপে ১১ খন আসনত জয়লাভ কৰাৰ বিপৰীতে ১২ খন আসনত আগবাঢ়ি আছে। ইফালে এই পৰ্যন্ত এখনো আসনত জয় বা অগ্ৰগতি লাভ কৰা নাই কংগ্ৰেছে।
নিৰ্বাচনৰ আটাইতকৈ লক্ষ্যণীয় কথাটো হ’ল যে আপ প্ৰধান তথা দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱাল, প্ৰাক্তন উপ-প্ৰধানমন্ত্ৰী মনীষ ছিচ’ডিয়া, প্ৰাক্তন মন্ত্ৰী সত্যন্দ্ৰ জৈনৰ দৰে নেতাই পৰাজয়ৰ মুখ দেখিবলগীয়া হৈছে।
