সংসদৰ বৰ্ষাকালীন অধিৱেশন আৰম্ভ হোৱাৰ পৰাই অপাৰেচন সিন্দূৰ আৰু পেহেলগাম নৰহত্যাক লৈ লোকসভা আৰু ৰাজ্যসভাত অচলাৱস্থাৰ সৃষ্টি কৰিছে সন্মিলিত বিৰোধীয়ে। এই বিষয় দুটা সন্দৰ্ভত প্ৰধানমন্ত্ৰী নৰেন্দ্ৰ মোদীৰ উপস্থিতিত সদনৰ মজিয়াত আলোচনাৰ দাবী জনাই আহিছে বিৰোধীয়ে।
শেহতীয়াকৈ লাভ কৰা খবৰ অনুসৰি, সদনৰ মজিয়াত অহা ২৯ জুলাইত অপাৰেচন সিন্দূৰ সন্দৰ্ভত চৰ্চা হোৱাৰ সম্ভাৱনা আছে। চৰকাৰে উচ্চ আৰু নিম্ন সদনত এই বিষয়টো চৰ্চাৰ বাবে ১৬ ঘণ্টা সময় নিৰ্ধাৰণ কৰিছে।
ৰাষ্ট্ৰীয় সংবাদ মাধ্যমত প্ৰকাশ পোৱা খবৰ অনুসৰি চৰকাৰৰ হৈ অপাৰেচন সিন্দূৰ সন্দৰ্ভত সদনত প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ আৰু প্ৰতিৰক্ষা মন্ত্ৰী ৰাজনাথ সিঙে মন্তব্য আগবঢ়াব।
নিউজ এজেন্সি ANIৰ প্ৰতিবেদন অনুসৰি, বুধবাৰে অনুষ্ঠিত হোৱা ৰাজ্যসভাৰ বিজনেছ এডভাইজৰী কমিটিৰ বৈঠকত অপাৰেচন সিন্দূৰ সন্দৰ্ভত উচ্চ সদনত অহা ২৯ জুলাইত চৰ্চা কৰাৰ সিদ্ধান্ত লোৱা হৈছে। ইয়াৰ বাবে ১৬ ঘণ্টা সময় নিৰ্ধাৰণ কৰিছে।
ইফালে অপাৰেচন সিন্দূৰ সন্দৰ্ভত যেতিয়াই সদনত আলোচনা হ’ব তেতিয়া প্ৰধানমন্ত্ৰী নৰেন্দ্ৰ মোদী উপস্থিত থাকিব লাগিব বুলি দাবী কৰি আহিছে বিৰোধীয়ে।
উল্লেখ্য যে, জম্মু-কাশ্মীৰৰ পেহেলগামত হোৱা নৃশংস সন্ত্ৰাসবাদী আক্ৰমণৰ পিছতেই ভাৰত চৰকাৰে অপাৰেচন সিন্দূৰৰ জৰিয়তে পাকিস্তানৰ ভূমিত থকা সন্ত্ৰাসবাদীৰ ঘাটিত ভয়ংকৰ আক্ৰমণ সংঘটিত কৰিছিল। এই আক্ৰমণৰ পিছতেই ভাৰত-পাকিস্তানৰ মাজত আৰম্ভ হৈছিল যুদ্ধসদৃশ পৰিস্থিতি।
ইয়াৰ পিছত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ হস্তক্ষেপত দুয়োখন দেশৰ মাজত হোৱা সংঘাতৰ অন্ত পেলোৱা বুলি দাবী কৰিছিল। ট্ৰাম্প কৰি অহা দাবী সন্দৰ্ভত কংগ্ৰেছ নেতা ৰাহুল গান্ধীয়ে সমালোচনা কৰি আহিছে ভাৰত চৰকাৰক।
