শুল্কক লৈ সমগ্ৰ বিশ্বতে অচলাৱস্থাৰ সৃষ্টি কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ৰাছিয়াৰ পৰা তেল ক্ৰয়ৰ অজুহাত দেখুৱাই আমেৰিকাই ভাৰতৰ ওপৰত প্ৰথমে ২৫ শতাংশ আৰু পিছত জৰিমনা হিচাপে পুনৰ ২৫ শতাংশ অতিৰিক্ত শুল্ক আৰোপ কৰিছিল।
ইয়াৰ উপৰিও ইউক্ৰেইন যুদ্ধক লৈ ৰাছিয়াৰ ওপৰত বহু নিষেধাজ্ঞা আৰোপ কৰা হৈছে, আনহাতে চীনৰ ওপৰতো যথেষ্ট শুল্ক ঘোষণা কৰা হৈছে যদিও এই শুল্ক এতিয়াও কাৰ্যকৰী হোৱা নাই।
এই শুল্কযুদ্ধক লৈ পৰিস্থিতি উদ্বিগ্ন হৈ থকাৰ সময়তে চীনৰ টিয়ানজিনত এছ চি অ’ শীৰ্ষ সন্মিলনৰ সময়ত প্ৰধানমন্ত্ৰী মোদী, ৰাছিয়াৰ ৰাষ্ট্ৰপতি ভ্লাডিমিৰ পুটিন আৰু চীনৰ ৰাষ্ট্ৰপতি ছি জিনপিঙে আলোচনাত মিলিত হৈছে।
ভাৰতে এতিয়াও আমেৰিকাৰ সৈতে কোনো বাণিজ্যিক চুক্তি স্বাক্ষৰ কৰা নাই। ইয়াৰ মাজতে একেখন মঞ্চতে ৰাছিয়া, চীন আৰু ভাৰত অহাৰ বাবে আমেৰিকাৰ লগতে সমগ্ৰ বিশ্বৰ দৃষ্টি নিৱদ্ধ হৈছে।
এই সকলোবোৰৰ মাজত আজি নিশা ১১.৩০ বজাত (ভাৰত সময় অনুসৰি) এটা ডাঙৰ ঘোষণা কৰিবলৈ ওলাইছে আমেৰিকাৰ ৰাষ্ট্ৰপতি ড’নাল্ড ট্ৰাম্পে।
বাণিজ্য সম্পৰ্কীয় নীতি বা শুল্কৰ ক্ষেত্ৰত ট্ৰাম্পে কিছু ডাঙৰ ঘোষণা কৰিব পাৰে বুলিও জল্পনা-কল্পনা কৰা হৈছে। শেহতীয়াকৈ আমেৰিকাৰ এখন আদালতে ট্ৰাম্পৰ শুল্ক অবৈধ বুলি ঘোষণা কৰাৰ পিছতে তেওঁ উচ্চতম ন্যায়ালয়লৈ যোৱাৰ কথা কয়।
সংবাদ সংস্থা ৰয়টাৰৰ প্ৰতিবেদনত দাবী কৰা হৈছে যে ট্ৰাম্প প্ৰশাসনে ইতিমধ্যে জানিছিল যে শুল্ক সন্দৰ্ভত আদালতৰ সিদ্ধান্ত তেওঁলোকৰ বিৰুদ্ধে আহিব পাৰে। ইয়াৰ বাবেই ইতিমধ্যে ট্ৰাম্প প্ৰশাসনে প্লেন বি প্ৰস্তুত কৰিবলৈ আৰম্ভ কৰিছিল।
যোৱা কেইদিনমানৰ পৰা ৰাজহুৱা অনুষ্ঠানত দেখা পোৱা নাই ট্ৰাম্পক। অৱশ্যে ছ’চিয়েল মিডিয়া প্লেটফৰ্ম ট্ৰুথ ছ’চিয়েলত তেওঁ অহৰহ সক্ৰিয় হৈ আছে। একে সময়তে ৭৯ বছৰীয়া ট্ৰাম্পৰ স্বাস্থ্যৰ বিষয়েও উৰাবাতৰি প্ৰকাশ পাইছে। যোৱা সপ্তাহত তেওঁৰ স্বাস্থ্যৰ বিষয়ে উৰাবাতৰি বিয়পি পৰিছিল আৰু #WhereIsTrump ৰ দৰে হেচটেগ ট্ৰেণ্ডিং কৰিবলৈ আৰম্ভ কৰিছিল।
