আমেৰিকা আৰু চীনৰ মাজত টিকটকক লৈ ওলাইছে এক ডাঙৰ খবৰ। আমেৰিকাৰ ৰাষ্ট্ৰপতি ড’নাল্ড ট্ৰাম্পে ১৬ ছেপ্টেম্বৰত ঘোষণা কৰিছে যে টিকটক সন্দৰ্ভত আমেৰিকা আৰু চীনৰ মাজত চুক্তি হৈছে। ব্ৰিটেইন ভ্ৰমণলৈ যোৱাৰ পূৰ্বে ট্ৰাম্পে হোৱাইট হাউছত কয় যে, ট্ৰাম্প চৰকাৰে টিকটক সন্দৰ্ভত এক চুক্তিত উপনীত হৈছে আৰু এই সন্দৰ্ভত চীনৰ ৰাষ্ট্ৰপতি ছি জিনপিঙৰ সৈতে আলোচনা কৰিছে।
স্পেইনৰ ৰাজধানী মাদ্ৰিদত আমেৰিকাৰ বিত্তমন্ত্ৰী স্কট বেছাণ্ট আৰু চীনৰ উপ-প্ৰধানমন্ত্ৰী হে লিফঙৰ মাজত দুদিনীয়া আলোচনাৰ অন্তত এই চুক্তিত উপনীত হৈছে। চীনৰ বাইটডান্সৰ মালিকানাধীন টিকটকৰ বিশ্বজুৰি প্ৰায় দুই বিলিয়ন ব্যৱহাৰকাৰী আছে। এই চুক্তিৰ অধীনত টিকটকৰ নিয়ন্ত্ৰণ আমেৰিকাৰ কোম্পানীসমূহৰ হাতলৈ আহিব। আমেৰিকাৰ ৰাষ্ট্ৰপতিগৰাকীয়ে কয় যে আমেৰিকাৰ কোম্পানীসমূহে টিকটক ক্ৰয় কৰিবলৈ আগবাঢ়ি আহিছে।
২০২৫ চনৰ জানুৱাৰী মাহতেই আমেৰিকাত টিকটক নিষিদ্ধ কৰা হৈছিল যদিও এতিয়াও চলি আছে। এই চুক্তিৰ বাবে চীনক ১৭ ছেপ্টেম্বৰলৈ সময় দিয়া হৈছিল। এই চুক্তি নহ’লে আমেৰিকাত টিকটক সম্পূৰ্ণৰূপে নিষিদ্ধ হ’লহেঁতেন।
এক প্ৰতিবেদন অনুসৰি, ৩০-৪৫ দিনৰ ভিতৰত এই চুক্তি সম্পূৰ্ণ হোৱাৰ সম্ভাৱনা আছে। ২০২৪ চনত আমেৰিকাত এখন আইন গৃহীত হয়, যাৰ অধীনত চীনৰ কোম্পানী বাইটেডেন্সে আমেৰিকাৰ কাৰ্য্যকলাপৰ মালিকীস্বত্ব টিকটকক বিক্ৰী কৰিবলগীয়া হয়। সেই সময়ত আশংকা কৰা হৈছিল যে চীন চৰকাৰে এই এপৰ জৰিয়তে আমেৰিকান ব্যৱহাৰকাৰীৰ তথ্য লাভ কৰিব পাৰিব।
অহা মাহত দক্ষিণ কোৰিয়াত অনুষ্ঠিত হ’বলগীয়া এপেক শীৰ্ষ সন্মিলনত ছি জিনপিঙৰ সৈতে ট্ৰাম্পৰ প্ৰস্তাৱিত বৈঠকৰ বাবেও এই চুক্তি চৰ্ত বুলি কয়।
