২০ জানুৱাৰী (সোমবাৰ)ত ড’নাল্ড ট্ৰাম্পে আমেৰিকাৰ ৪৭ সংখ্যক ৰাষ্ট্ৰপতি হিচাপে শপতগ্ৰহণ কৰিলে। ৭৮ বছৰীয়া ৰিপাব্লিকান পাৰ্টীৰ নেতা ট্ৰাম্পে শক্তিশালীভাৱে চাৰিবছৰৰ মূৰত হোৱাইট হাউছত প্ৰত্যাৱৰ্তন কৰিছে।
দায়িত্ব গ্ৰহণ কৰিয়েই ট্ৰাম্পে কেতবোৰ এনে ডাঙৰ সিদ্ধান্ত গ্ৰহণ কৰিছে, যিসমূহে বিশ্বজুৰি চাঞ্চল্যৰ সৃষ্টি কৰিছে। তেওঁ প্ৰব্ৰজন, শুল্ক আৰু শক্তিকে ধৰি কেইবাটাও ক্ষেত্ৰত আমেৰিকাৰ নীতি সলনি কৰাৰ প্ৰতিশ্ৰুতি প্ৰদান কৰিছে।
ড’নাল্ড ট্ৰাম্পৰ ৫টা ডাঙৰ সিদ্ধান্ত
আমেৰিকাৰ ৪৭ সংখ্যক ৰাষ্ট্ৰপতি হিচাপে শপত গ্ৰহণ কৰাৰ পিছত ড’নাল্ড ট্ৰাম্পে এনে ৫টা সিদ্ধান্ত গ্ৰহণ কৰিছে, যাৰ প্ৰভাৱ বিশ্বত দেখা যাব, যিবোৰ তলত উল্লেখ কৰা হৈছে।
শপত গ্ৰহণ কৰাৰ পূৰ্বে ট্ৰাম্পে কৈছিল যে তেওঁ কানাডাৰ ওপৰত ২৫ শতাংশ শুল্ক আৰোপ কৰিব। ৰাষ্ট্ৰপতি হোৱাৰ পিছতেই এই সিদ্ধান্তত অনুমোদন জনোৱা হয়।
পেৰিছ জলবায়ু চুক্তিৰ পৰাও আঁতৰি অহাৰ সিদ্ধান্ত গ্ৰহণ কৰে ট্ৰাম্পে।
ট্ৰাম্পে বিশ্ব স্বাস্থ্য সংস্থা (WHO)ৰ পৰাও আঁতৰাৰ সিদ্ধান্ত গ্ৰহণ কৰিছে। ক’ভিড মহামাৰী নিয়ন্ত্ৰণ কৰাত WHO চূড়ান্ত ব্যৰ্থ হোৱাৰ অভিযোগ তুলি ট্ৰাম্পে এই সিদ্ধান্ত গ্ৰহণ কৰে।
ট্ৰাম্পে নাগৰিকত্ব আইন সম্পৰ্কীয় সিদ্ধান্ত গ্ৰহণ কৰিছে, সেই অনুসৰি আমেৰিকাত জন্মগত অধিকাৰৰ নাগৰিকত্ব শেষ কৰাৰ নিৰ্দেশ দিয়া হৈছে। অৰ্থাৎ এতিয়া যিসকল লোকৰ হাতত আমেৰিকাৰ নাগৰিকত্বৰ আইনী নথি-পত্ৰ নাই আৰু এই সময়ছোৱাত যদি তেওঁলোকে আমেৰিকাত সন্তান জন্ম দিয়ে, সেই সন্তানসকলে স্বয়ংক্ৰিয়ভাৱে আমেৰিকাৰ নাগৰিকত্ব লাভ নকৰিব।
ইয়াৰ উপৰি ট্ৰাম্পে আন এক ডাঙৰ সিদ্ধান্ত লৈছে যে এতিয়াৰ পৰা ড্ৰাগছ সম্পৰ্কীয় গোচৰত ধৰা পৰা লোকক সন্ত্ৰাসবাদী ঘোষণা কৰা হ’ব।
উল্লেখ্য যে, কমলা হেৰিছক পৰাস্ত কৰি ৪৭ সংখ্যক ৰাষ্ট্ৰপতি হিচাপে জয় লাভ কৰা ড’নাল্ড ট্ৰাম্পে ২০ জানুৱাৰীত শপত লয়। এই শপতগ্ৰহণ অনুষ্ঠানত বিশ্বৰ কেইবাখনো দেশৰ শীৰ্ষ নেতাসকলে অংশগ্ৰহণ কৰে। ট্ৰাম্পৰ শপতগ্ৰহণ অনুষ্ঠানত ভাৰতৰ হৈ বৈদেশিক মন্ত্ৰী এছ জয়শংকৰ উপস্থিত থাকে।
