যঃ দেৱী সৰ্বভূতেষু শক্তিৰূপেন সংস্থিতা।
নমঃতস্মৈ নমঃতস্মৈ নমঃতস্মৈ নমোনমঃ।।
উখল মাখল পথাৰত এতিয়া সেউজীয়াৰ ঢল। কহুৱা ফুলাৰ বতৰত শেৱালীৰ সুৱাসেৰে আকৌ আগমন ঘটিল শৰতৰ। আকাশে বতাহে চাৰিওফালে মাদকতা ছটিয়াই পুনৰ ধৰালৈ অহাৰ প্ৰস্তুতি চলাইছে শৰতে।
শাৰদীয় দুৰ্গোতসৱলৈ মাজত মাথোঁ আৰু কেইটামান দিন। ৰাজ্যৰ চৌদিশে চলিছে শাৰদীয় দুৰ্গাপূজাৰ ব্যাপক প্ৰস্তুতি।
ৰাজ্যৰ ভিন্ন প্ৰান্তৰ সমান্তৰালকৈ ব্যস্ততা বাঢ়িছে দুৰ্গা পূজা উদযাপন সমিতি সমূহৰ।শদিয়াৰ পৰা ধুবুৰীলৈকে চৌদিশে বৰ্তমান পূজাৰ আনন্দ। সমাজৰ দুষ্কৃতিকাৰী আৰু অশুভ শক্তিক নাশিবলৈ ধৰালৈ নামিব আদ্যাশক্তি মহামায়া। শক্তিৰ অধিষ্ঠাত্ৰী দেৱীৰ শ্ৰীচৰণত দেৱীৰ অকাল-বোধনৰে আৰম্ভ হয় ভক্তৰ পূজা-অৰ্চনা।
শাৰদীয় দুৰ্গা পূজালৈ মাজত মাথোঁ আৰু কেইটামান দিন। শংখ, ঘন্টা, বৈদিক মন্ত্ৰোচ্চাৰণেৰে মুখৰ হ’ব ৰাজ্যৰ আকাশ-বতাহ৷ দুৰ্গা পূজাক লৈ এতিয়া ব্যস্ততাৰ অন্ত নাই ৰাজ্যৰ মৃৎ শিল্পীসকলৰো৷ দিনে নিশাই ব্যস্ত হৈ পৰিছে এই শিল্পী সকল।
তদুপৰি এইবাৰ ৰাম মন্দিৰৰ আৰ্হিত অসমবাসীয়ে প্ৰত্যক্ষ কৰিব পাৰিব পূজাৰ মণ্ডপ।কামৰূপৰ বোৰ্কা দুৰ্গা পূজা উদযাপন সমিতিয়ে চলাইছে এক বিশাল আয়োজন। বোৰ্কা সাৰ্ব্বজনীন দুৰ্গা পূজাৰ খনিয়ে এইবাৰ উদযাপন কৰিব শতবৰ্ষ। প্ৰায় ৭০ লক্ষ্যাধিক টকাৰ ব্যয়বহুল বাজেটেৰে এঘাৰ দিনীয়াকৈ এইবাৰ অনুষ্টিত কৰিব বোৰ্কা সাৰ্ব্বজনীন শ্ৰী শ্ৰী দুৰ্গা পূজা খনিৰ শতবৰ্ষ।
মা দূৰ্গাৰ শুভাগমনে এই ধৰাৰ বুকুলৈ কঢ়িয়াই আনক সুখ-শান্তি আৰু সমৃদ্ধিৰ বতৰা। শাৰদীয় দূৰ্গোৎসৱৰ এই প্ৰাকমূহুৰ্তত সকলোলৈ থাকিল বিশেষ শুভকামনা।
